Búgin Parlament Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine aqparat jáne komýnıkasıalar máseleleri boıynsha ózgerister men tolyqtyrýlar engizý týraly» zań jobasyn eki oqylymda qarap, qabyldady, dep habarlaıdy Qamshy.kz aqparat agenttigi QazAqparatqa silteme jasap.
«Zań jobasyn daıyndaý barysynda jan-jaqty taldaý júrgize otyryp, osy máselelerdiń barlyǵyn qamtydyq. Qujat bir jyldyń ishinde qoǵamda ashyq talqylandy. Mınıstrlik oǵan barynsha múmkindik jasady. Parlamenttiń, qoǵamdyq birlestikter men jýrnalıser uıymdarynyń ókilderimen arnaıy jumys tobyn qurdyq. Budan bólek, birneshe ret respýblıkalyq, sondaı-aq óńirlik deńgeıdegi talqylaýlar ótti. Sonymen qatar azamattar ınternette de qyzý talqylap, usynystar joldady. Jobany jetildirý barysynda barlyq usynystar men pikirler eskerildi. Qoryta aıtqanda, zań jobasynda 16 zańǵa jáne 6 kodekske 280-nen astam ózgerister men tolyqtyrýlar engizý qarastyrylyp otyr», - dedi Senattyń jalpy otyrysynda QR Aqparat jáne komýnıkasıalar mınıstri Dáýren Abaev.
Osy oraıda mınıstr jobada qarapaıym azamattardyń aqparat salasyndaǵy quqyqtaryn qamtamasyz etetin birqatar normalar usynylyp otyrǵanyn atap ótti. Solardyń biri tulǵa men redaksıa arasyndaǵy dálelsiz aqparatqa qatysty daý-damaıdy sotqa deıin sheshý tártibine qatysty.
«Qazir aqparattyń taralý jyldamdyǵy buryn-sońdy bolmaǵan deńgeıge jetti. Bir ǵana jalǵan derek sanaýly ýaqytta adamǵa orasan nuqsan keltire alady. Sondyqtan da biz azamattardy osyndaı jaǵdaıdan qorǵaı otyryp, sonymen qatar máseleni sotqa deıin retteý jolyn usynyp otyrmyz. Árıne, bul rette zańda BAQ- tyń teriske shyǵarýdan bas tartyp, azamattyń sotqa júginýin kútý saqtalady», - dep túsindirdi D. Abaev.
Taǵy bir qarastyrylyp otyrǵan másele - cýbtıtrdi jáne sýrdoaýdarmany qoldaný arqyly múmkindigi shekteýli jandardyń aqparatqa qoljetimdiligin qamtamasyz etýge baılanysty.
«Aqparat quraldarynda azamattardyi ruqsatynsyz olardyń sýretin qoldanýǵa arnalǵan talaptar tizbesi bekitildi. Mysaly, endigi jerde qandaı da bir tulǵa mádenı-kópshilik, sporttyq jáne basqa da sharalarǵa ári jurt aldynda sóz sóıleýge qatyssa, jýrnalıser onyń sýretin ruqsat suramaı-aq jarıalaı alady. Balalardy zıandy aqparattan qorǵaýdy qamtamasyz etýge baǵyttalǵan normalar da qarastyrylyp otyr. Atap aıtqanda, jalpy bilim beretin mektepterde oqýshylardy «tazartylǵan Internet kontentimen» qamtamasyz etý talaby kózdelýde», - deıdi mınıstr.
Buǵan qosa, kúsh kórsetý, jábirleý saldarynan zardap shekken bala týraly jeke málimetter men onyń sýretin balanyń óziniń nemese onyń zańdy ókilderiniń kelisiminsiz qoldanýdy shekteý tárizdi ózgerister usynylyp otyr.
Munymen qosa, BAQ-tyń qyzmetine qoldaý kórsetý maqsatynda birqatar ózgertýler engizilmek. Máselen, qoldanystaǵy zańda bolmashy zańbuzýshylyq úshin aqparat quralynyń tırajyn tárkileýden bastap, qyzmetin toqtatýǵa deıingi birqatar qataý sharalar qarastyrylǵan bolatyn. Jańa jobada osyndaı ákimshilik jazalardy jeńildetetin nemese alyp tastaıtyn normalar qamtyldy. Baspa BAQ úshin taǵy bir jeńildik - gazettiń nemese jýrnaldyń ókiletti organǵa ótkiziletin mindetti danasyn endi elektrondy túrde tapsyrýǵa ruqsat berilmek.
«Tutastaı alǵanda, zań jobasy aqparat, baılanys jáne aqparattandyrý sýbektileri úshin ońtaıly jaǵdaı jasap, olardyń odan ári qarqyndy damýyna baǵyttalyp otyr» - dep túıindedi sózin vedomstvo basshysy.
