«Jebeý» Respýblıkalyq qoǵamdyq birlestigi Elbasynyń «Bolashaqqa baǵdar: rýhanı jańǵyrý» baǵdarlamasy aıasynda ǵalym, shyǵystanýshy, tarıh ǵylymdarynyń doktory Nábıjan Muqamethanulynyń daıyndap baspaǵa usynýymen áıgili ǵalym, tarıhshy Nıǵymet Myńjanıdyń «Tańdamaly maqalalar», áıgili tarıhshy, qoǵam jáne memleket qaıratkeri Zardyqan Qınaıatulynyń «Tarıhqa kózqaras», «Naıman handyǵy: tarıhy jáne mádenıeti Hİİ-HİH ǵǵ.» atty kitaptaryn shyǵardy, dep habarlaıdy Qamshy.kz aqparat agenttigi.
Nıǵymet Myńjanıdyń qazaqtyń tarıhyn, áleýmettik sharýashylyǵyn, etnografıasyn, tili men ádebıetin jáne fólkloryn zerttegen eńbekteriniń ǵylymı jáne praktıkalyq qundylyǵy qazir de joıylǵan joq. Elbasynyń «Bolashaqqa baǵdar: rýhanı jańǵyrý» ıdeıasy boıynsha elimizde qolǵa alynyp jatqan ulttyq qundylyqtarymyzdy jańǵyrtý ıgi sharalaryna sáıkes, ǵalymnyń Qazaqstanda jaryq kórmegen eńbekteri arasynan tańdap alynǵan ǵylymı maqalalar toptamasy kirgen. Jınaqtan ǵalymnyń qazaq tarıhy, áleýmettik sharýashylǵy, tili, dini, ápsanalary men fólklory jaıly jazǵan qundy da qyzyqty materıaldardy kórýge bolady.
Zardyqan Qınaıatulynyń «Tarıhqa kózqaras» atty jınaǵynda avtordyń 1996-2015 jyldary Qazaqstan baspasózinde jarıalanǵan ǵylymı maqalalary, keleli suhbattary men estelikteri engizilgen. Jınaq eki tomnan turady. Jınaqtan ǵalymnyń tarıhqa jańa ǵylymı oı-tujyrymdaryn, qoǵamdyq-saıası konseptýaldyq ótkir pikirlerin, tarıhı tulǵalar týraly, kózi kórgen belgili adamdar jaıly jazǵan qundy da qyzyqty materıaldardy oqı alasyzdar.
«Naıman handyǵy: tarıhy jáne mádenıeti Hİİ-HİH ǵǵ.» - Hİ-Hİİİ ǵasyrlarda Altaı, Hanǵaı aralyǵynda saltanat qurǵan Naıman handyǵynyń tarıhy men mádenıetiniń qundy muralaryn zertteýge arnalǵan alǵashqy monografıa. Zertteý jelisi qazaqtyń naıman taıpasynyń HİH ǵasyrǵa deıingi tarıhı oqıǵasyn qamtıdy. Monografıada Naıman handyǵynyń saıası qurylymy, etnodemografıasy, nanym-senimi, mádenıeti, sharýashylyǵy men turmys salty jan-jaqty taldanǵan. Qazaq memlekettiligi tarıhy qazirde zerttelý ústinde. Qazaq memlekettiligine Naıman ulysynyń qosqan ózindik úlesi bar. Avtordyń kóp jyl izdenisteriniń nátıjesinde memlekettilik tarıhymyzdaǵy aqtańdaqtarynyń bir parasy bútindelip, «Rýhanı jańǵyrý» baǵdarlamamyzdyń aıasynan jaryq kórip otyr.
Atalǵan úsh kitaptyń tusaýy 2017 jyldyń 26 jeltoqsanynda QR Ulttyq kitaphanasynyń úlken zalynda kesiledi.
Kitaptardyń tusaýyn Qazaqstannyń halyq jazýshysy Qabdesh Jumadilov, tarıh ǵylymdarynyń doktory, QR UǴA akademıgi Mámbet Qoıgeldi, tarıh ǵylymdarynyń doktory, QR UǴA akademıgi Hangeldi Ábjanov kesedi.
