Qazaqstan Respýblıkasynyń Memlekettik hatshysy Gúlshara Ábdihalyqovanyń tóraǵalyq etýimen jańartylǵan quramda alǵash ret Qazaqstan Respýblıkasy Prezıdentiniń janyndaǵy Jastar saıasaty jónindegi Keńestiń HH otyrysy ótti dep habarlaıdy Qamshy.kz aqparat agenttigi.
Otyrysqa Úkimet músheleri, Qazaqstan Respýblıkasy Parlamentiniń depýtattary, sarapshylar, elimizdiń jastar uıymdarynyń kóshbasshylary qatysty.
Óziniń kirispe sózinde G.Ábdihalyqova jastar saıasaty - 2050 Strategıasynyń negizgi maqsatynyń biri ekenin atap ótti. Memleket basshysy: «Bizdiń jastarymyz oqýǵa, jańa ǵylym-bilimdi ıgerýge, jańa mashyqtar alýǵa, bilim men tehnologıany kúndelikti ómirde sheber de tıimdi paıdalanýǵa tıis. Biz bul úshin barlyq múmkindikterdi jasap, eń qolaıly jaǵdaılarmen qamtamasyz etýimiz kerek» dep atap ótken bolatyn.
Shara barysynda jastardy jumyspen qamtýǵa, onyń ishinde aýyl jastaryn jumyspen qamtýdy qamtamasyz etýge baǵyttalǵan Qazaqstan Respýblıkasy Prezıdentiniń janyndaǵy Jastar saıasaty jónindegi Keńestiń 2018 jylǵa arnalǵan jumys jospary qarastyryldy.
Keńes otyrysy aıasynda Din isteri jáne azamattyq qoǵam mınıstri Nurlan Ermekbaev memleket tarapynan jastardy qoldaýǵa baǵyttalǵan is-sharalardyń, atap aıtqanda «Túlekter taqtasy», «Jastar tájirıbesi», «Jasyl el», «Dıplommen aýylǵa» baǵdarlamalarynyń júzege asyrylýy jaıynda baıandady.
Sońǵy jyldary jastar arasyndaǵy jumyssyzdyq deńgeıi aıtarlyqtaı tómendegen. 2002 jylmen salystyrǵanda 2017 jyly 13,1% -dan 4% -ǵa deıin azaıǵan.
2017 jyldyń 3-toqsanynda belsendi jastar sany 2 120,7 myń, onyń ishinde jumyspen qamtylǵandary – 2 036,0 myń adam boldy.
Kún tártibinde qaralǵan máseleler boıynsha Eńbek jáne halyqty áleýmettik qorǵaý mınıstri Tamara Dúısenova, Bilim jáne ǵylym mınıstri Erlan Saǵadıev, Ulttyq ekonomıka vıse-mınıstri Serik Jumanǵarın, Qazaqstan jastar Kongresiniń atqarýshy dırektory Aıdyn Sabıtov, «Jastar» ortalyǵynyń dırektory Talǵat Qalıev baıandama jasady.
Keńes qorytyndysynda Memlekettik hatshy jastar saıasatyn iske asyrý boıynsha birqatar naqty tapsyrmalar berdi.
Esterińizge salaıyq, Qazaqstan Respýblıkasy Prezıdentiniń janyndaǵy Jastar saıasaty jónindegi Keńes elimizdegi memlekettik jastar saıasatyn jetildirý jónindegi sharalardy ázirleýge baǵyttalǵan negizgi suhbat alańy bolyp tabylady. Keńestiń jańartylǵan quramyna jalpy sany 51 adam múshe. Olardyń qatarynda ortalyq memlekettik organdardyń birinshi basshylary, jastar uıymdarynyń kóshbasshylary, bıznes, bilim, mádenıet, sport jáne BAQ ókilderi bar.
