Facebook áleýmettik jelisi kúmándi jańalyqtarǵa erekshe belgi qoıýdy doǵaratyn bolady. Sebebi sondaı belgige bola jurt jalǵan (feık) jańalyqtarmen kóbirek bólise bastaǵan, dep jazady Qamshy.kz aqparat agenttigi Azattyqqa súıenip.
Bul týraly Facebook kompanıasynyń blogynda aıtylǵan. Kompanıa áleýmettik jelige júrgizgen zertteý qorytyndysy boıynsha adamdar qyzyl túspen arnaıy belgi qoıylǵan jańalyqtardy mańyzdy habar retinde qabyldaǵan.
Kompanıa endi jalǵan jańalyqtardy belgileýdiń jańa algorıtmin iske qospaqshy. Iaǵnı kúmándi jańalyqtyń astynan ózge derek kózderinen alynǵan taǵy birneshe jańalyq kórinip turatyn bolady. Jańa júıeni synap kórýge faktchekıng boıynsha mamandanǵan ózge kompanıalar da qatysqan.
Ótken jyly Facebook áleýmettik jelisi jalǵan jańalyqtarǵa qarsy kúres kampanıasyn bastaǵan. İri aqparattyq agenttikter áleýmettik jelige kúmándi jańalyqtardy belgileýge belsendi túrde kómektesken. Qazirgi kezde Facebook kompanıasy 2016 jylǵy AQSH prezıdenti saılaýyna Reseıdiń yqtımal aralasýyna baılanysty AQSH senaty júrgizip jatqan tekserýge de atsalysyp otyr.
