Ózbekstan prezıdenti Shavkat Mırzıaevtiń kenje qyzy Shahnoza Ýmarova bıyl prezıdent jarlyǵymen qurylǵan mektepke deıingi bilim mınıstrliginde jańa qyzmetke taǵaıyndaldy, dep Qamshy.kz aqparat agenttigi Azattyqqa siltep jazady. 

Bul týraly Azattyqtyń Ózbek qyzmeti prezıdent otbasyna jaqyn aqparat kózine jáne joǵary shendi ózbek sheneýnikteriniń biriniń aıtqanyna silteme jasap habarlady.

Atalǵan mınıstrlik qyzmetkerleriniń biri Azattyqqa bul málimetti rastaǵan. Shahnoza Ýmarova endi mektepke deıingi bilim júıesin reformalaýǵa jaýap beretin bolady.

Prezıdent Shavkat Mırzıaev ótkizgen selektorlyq jıyndardyń birinde Shahnoza Ýmarova mektepke deıingi bilim mınıstri Agrıppına Shınniń janynda otyrǵan. Shahnoza Ýmarovanyń jasy 31-de.

Ózbekstanda mektepke deıingi bilim mınıstrligi bıylǵy 30 qyrkúıekte prezıdent Mırzıaevtiń «Mektepke deıingi bilim júıesin túpkilikti jetildirý sharalary» týraly jarlyǵy boıynsha qurylǵan.

18 jeltoqsanda ótken selektorlyq jıynda prezıdent Shavkat Mırzıaev Ózbekstan bala baqshalarynda «balanyń áleýmettik, tulǵalyq, emosıonaldyq, sóıleý, matematıkalyq, psıhologıalyq jáne shyǵarmashylyq damýyna qatysty oqý baǵdarlamalary engizilmegendigin» , bala baqshalardyń oqý ornyna aınala almaı, «ata-analary jumysta bolǵan kezinde tek qana balaǵa qaraıtyn mekeme bolyp» qalǵanyn aıtqan.

Mektepke deıingi bilim mınıstriniń orynbasary Qahramon Arıpov «Ózbekıston» telearnasyna bergen suhbatynda elde Ońtústik Koreıa tájirıbesi boıynsha bala baqshalardyń qurylatynyn jarıalaǵan. Onyń aıtýynsha, bala baqshalar shaǵyn jáne 50, 100, 150 adamǵa eseptelinip qurylady.