Oralda 5517-áskerı bólimniń kınology, serjant Baqtyǵalı Áıkenov ıttiń kómegimen joǵalǵan qyzdy tapty dep habarlaıdy Qamshy.kz aqparat agenttigi QR Ulttyq ulany «Batys» óńirlik qolbasshylyǵynyń baspasóz qyzmetine silteme jasap. 

23 jeltoqsan kúni saǵat keshki 20.00 shamasynda «Soltústik-SHyǵys» shaǵynaýdanynda I. degen azamatsha úsh jasar qyzy joǵalǵany jóninde quramynda kishi serjant Asqat Shalabaev, kınolog, serjant Baqtyǵalı Áıkenov jáne qatardaǵy jaýynger Roman Rázanov bar topqa aıtyp, kómektesýin ótingen.

Áıel Ábilqaıyr kóshesi boıyndaǵy «Kerýen» dúkenine kirip, zattardy qarap jatqan mezgilde kishkentaı Iradanyń shyǵyp ketkenin baıqamaı qalǵan. B.Áıkenov anasynan qyzdyń qolǵabyn alyp, Sherıf esimdi ıtke ıisketip, izine túsken. 15 mınýttan keıin qyzmettik ıt kınologty E.Oraqbaev atyndaǵy kósheniń boıyndaǵy 8-úıge alyp kelgen.

Qoryqqan qyz jan-jaǵyna qarap, sol jerde turǵan. Qyzdyń anasy Indıra Nurjanova Ulttyq ulan jaýyngerleriniń qyraǵylyq kórsetkeni úshin «Batys» óńirlik qolbasshysy, general-maıor Álibek Serálıevtiń atyna hat jazyp, alǵysyn bildirdi.

Atalǵan  áskerı jasaq jaýyngerleri áskerı bólim basshylyǵynyń   tarapynan  marapattaldy.