Memleket basshysy AQSH-tyń Qazaqstan Respýblıkasyndaǵy Tótenshe jáne ókiletti elshisi Djordj Krolmen kezdesý ótkizdi, dep habarlaıdy Qamshy.kz aqparat agenttigi  Aqordanyń baspasóz qyzmetine silteme jasap.

Memleket basshysy Nursultan Nazarbaev Djordj Kroldyń Qazaqstan Respýblıkasy men AQSH arasyndaǵy ekijaqty qarym-qatynasty damytýda erekshe ról atqaratynyn aıtyp, búgingi kezdesý Qazaqstan Prezıdentiniń Amerıka Qurama Shtattaryna resmı sapary qarsańynda ótip jatqanyn atap ótti.

– 26 jyl ishinde bizdiń elderimiz arasynda ózara dostyq qarym-qatynas ornap, 70-ten astam memleketaralyq, úkimetaralyq jáne vedomstvoaralyq kelisimge qol qoıyldy, – dedi Nursultan Nazarbaev.

Kezdesý barysynda Memleket basshysy AQSH Prezıdenti D.Tramppen birge strategıalyq seriktestiktiń basym baǵyttarynda, sonyń ishinde terorızmge qarsy kúres júrgizý, ıadrolyq qarýdy taratpaý rejimin nyǵaıtý salasynda, sondaı-aq saýda-ekonomıkalyq jáne ınvestısıalyq yntymaqtastyq aıasyn odan ári keńeıtý baǵytynda qol jetkizilgen ýaǵdalastyqtardyń mańyzdylyǵyn aıtty.

– Qazaqstanda Amerıka kapıtalynyń qatysýymen 500-ge jýyq kompanıa jumys isteıdi, solardyń 140-tan astamy – birlesken kásiporyndar. Olar taýar óndirip, ónimderin basqa elderge eksporttaýmen aınalysady, – dedi Qazaqstan Prezıdenti.

Djordj Krol Qazaqstan Respýblıkasyndaǵy dıplomatıalyq qyzmetine joǵary baǵa bergeni úshin Nursultan Nazarbaevqa alǵys aıtyp, Qazaqstan Prezıdentiniń aldaǵy sapary eki memleket arasyndaǵy baılanysty odan ári nyǵaıta túsetinine senim bildirdi.