Qazaqstan parlamenti májilisiniń depýtaty Baqytbek Smaǵul 9 qańtar kúni Aqtóbedegi №56 mektepte balalary sabaqqa oramalmen kelip júrgen ata-analarmen kezdesti. Bul týraly Qamshy.kz aqparat agenttigi Azattyq radıosyna silteme berip. Aqtóbe oblystyq bilim basqarmasy uıymdastyrǵan bul kezdesýge muǵalimder men ata-analar, barlyǵy 200-den astam adam kelgen.

Kezdesýde sóz sóılegen qala turǵyny Svetlana Dosmaǵambetovanyń aıtýynsha, 9 synypta oqıtyn qyzy oramaly úshin dúısenbiden beri mektepke kire almaı júr.

Ózin «Dáýletkereı Názenovpin» dep tanystyrǵan qala turǵyny minberge shyǵyp, Qazaqstannyń bilim mınıstrligi, parlament depýtattary men din isteri jónindegi agenttik tóraǵasyna arnalǵan úndeýin oqyp berdi. Úndeý sońynda «biz mundaı qysymnan sharshap kettik, óz otanymyzda ózimizdi bóten sezinip júrmiz. Oramal daýyn sheshýdiń joldary kóp. Sonyń biri - din ustanatyn oqýshy qyzdar úshin arnaıy mektep-medrese salý. Eger medrese búdjet úshin qymbatqa túsetin bolsa, bul máseleni ońtaıly sheshýdiń basqa da joldaryn qarastyrsańyzdar?» dedi ol.

Parlament májilisiniń depýtaty Baqytbek Smaǵul ashý qysyp, tus-tustan shýlap ketken ata-analardy sabyrǵa shaqyrýǵa tyrysty. Mektep muǵalimderiniń Qazaqstannyń bilim jáne ǵylym mınıstrliginiń 2016 jyly qańtardyń 14-i kúni shyqqan buıryǵyn negizge alyp otyrǵandyǵyn aıtty. Al Aqtóbe oblystyq bilim basqarmasynyń basshysy Lázzat Orazbaeva «mektep formasy saqtalýy kerek. Formanyń saqtalmaýynan oqýshy sabaqtan qalatyn bolsa, eń aldymen ata-ana jaýap beredi» dep eskertti.

Eki jarym saǵatqa sozylǵan jıynda taraptar bir mámilege kele almady. Parlament májilisiniń depýtaty Baqytbek Smaǵul aqtóbelikter kótergen máseleni Astanaǵa jetkizýge ýáde etti.