Qazaqstan Respýblıkasy Mádenıet jáne sport mınıstrliginiń tapsyrysy boıynsha Sh.Aımanov  atyndaǵy «Qazaqfılm» AQ  túsirgen «Pasany zovýt ego Batá» derekti fılmi Sevastopol qalasynda ótetin XIV Halyqaralyq derekti fılmderge arnalǵan «Pobedılı vmeste» kınofestıvalinde qazylar alqasy taǵaıyndaǵan «Jańa tulǵanyń obrazyn ashqany úshin» júldesine ıe boldy, dep habarlaıdy Qamshy.kz aqparat agenttigi «Qazaqfılm»-niń baspasóz qyzmetine silteme jasap.

Kınotýyndy zapastaǵy polkovnık, Aýǵan soǵysy ardageri, Chernobl AES apaty zardabyn joıý jumystaryna belsene qatysqan, «Legıon» áskerı-patrıottyq klýbynyń negizin qalaýshy ári jetekshisi Batýr Abdýsalamovtyń ómiri men qyzmeti týraly baıandaıdy.  Rejıseri – Aınur Ahmetjanova.

XIV Halyqaralyq derekti fılmderge arnalǵan «Pobedılı vmeste» kınofestıvaliniń Bas júldesi Marta Prýs esimdi polshalyq rejıserdiń «Za granú vozmojnogo» fılmine buıyrdy. «Eń úzdik qysqa metrajdy derekti fılm» júldesine reseılik Pavel Fattahýtdınovtyń «Pısma s voıny» fılmi qol jetkizse, «Úzdik derekti fılm» júldesin armán rejıseri Armen Hachatránnyń «Poslednee jelanıe» kartınasy jeńip aldy.

Bıyl festıválǵa 30 elden 100-den astam derekti fılmder men serıaldar usynyldy. Festıvál barysynda negizgi baıqaýmen qatar,  shyǵarmashylyq keshter, fılmderdiń kórsetilimi jáne basqa da is-sharalardan quralǵan konkýrstan tys baǵdarlamalar júrgizildi.

Atalǵan festıvál Ekinshi dúnıejúzi soǵysyna qatysqan qalalardyń qurmetine Qyrymda turatyn Keńes Odaǵy batyrlarynyń usynystary boıynsha ashylǵan. Festıváldiń basty maqsaty – Eýrazıa keńistiginde, sonymen qatar basqa da elderdiń kınokompanıalary men telearnalary jaryqqa shyǵarǵan ózekti máselelerge arnalǵan derekti fılmderdi bir shańyraq astyna jınap, olardy tanystyrý. Festıváldiń prezıdenti, Reseıdiń halyq artısi Vladımır Menshov.