«Evolúsıanyń 15 jyly: qubylmaly dúnıe jáne bizge ózgeris ákelgen álem»  degen taqyrypta ótip jatqan Eýrazıa Medıa Forýmynyń alǵashqy kúni aıaqtaldy, dep habarlaıdy Qamshy.kz aqparat agenttigi forýmnyń baspasóz ortalyǵyna silteme jasap.

Qarýly qaqtyǵystar, urys qımyldary, terrorǵa qarsy operasıalar. Osyndaı jantúrshigerlik oqıǵalar áskerı tilshilerdiń kúndelikti jumysynyń bir bóligi bolyp tabylady. «Otty aımaq» taqyryby boıynsha, áskerı jýrnalıs, dokýmentalıst, brıtandyq VVS korporasıasynda  14 jyl qyzmet etken Shahıda Tólegenova (Ulybrıtanıa) óziniń mol tájirıbesimen bólisti. «Qaqtyǵys aýmaǵynan reportaj» taqyryby boıynsha sheberlik dárisin ótkizgen ol  osy jumys barysynda turaqty armıa jáne qarýly toptarmen jumys, áskerı reportajdyń  óz ereksheligi, jeke basqa qaýip, psıhologıalyq jaraqat jaıly aıtyp berdi.

«Birjaqtylyqty ustaný árqashan ońaı. Al bizdiń basty maqsatymyz – mundaı jaǵdaıdy boldyrmaý. Men jýrnalıserge únemi: tek qana óz kózińmen kórgen dúnıeńdi aıtýǵa tıissiń dep aıtamyn. Soǵys taktıkasy men qarýly qaqtyǵys, negizinen bizdiń jumysymyz emes. Biz tek qana adamdar jaıly aıtýymyz qajet», - dep sanaıdy  Shahıda hanym.

Al kelesi spıker óz sózin «Búgin Iýsýf Omar baıandaǵandaı, aqparattyq tehnologıanyń damýyna birden bir sebepker -  spýtnık», - dep bastady . Jalpy, aspan álemi týraly óz tájirıbesimen bólisken jýrnalıs - koróldik astronomıalyq qoǵamnyń múshesi, Londondaǵy Ǵylym murajaıynyń elshisi Tıra Shýbart bolatyn.

«Qazirgi tańda ǵarysh aılaǵynda qoqystar óte kóp. Ǵaryshkerler qolǵabynan bastap, eski apparattardyń synyqtaryna deıin bar. Kez kelgen, tipti maıda synyqtar skafandrdy nemese syrtqy qaptamany zaqymdaýy múmkin.  Monetanyń ólshemindeı synyq eýropa spýtnıginiń kún paneline áser etip, nátıjesinde óz orbıtasynan shyǵyp qalǵan. Qazir NASA greıpfýrt ólshemindeı synyqtardy taýyp, olardy orbıtadan shyǵarý úshin jumys jasap jatyr. Biraq, ókinishke oraı bul áreketter árqashan oń nátıjeli bolmaýy múmkin», - dedi spıker.

Kelesi sheberlik dárisi aqparattyq tehnologıa damyǵan zamandaǵy medıaetıkanyń mán-mańyzy haqynda boldy. Semınardyń negizgi taqyryptary:  burmalanǵan aqparattyń qoǵamǵa teris áseri men feık-jańalyqtardyń túrli joldarmen taralýy, sondaı-aq  BAQ-taǵy  ótirik pen onyń jańa tehnologıalar arqyly kóptep taralýy.  Semınar ádistemesi medıaetıka boıynsha keısterdi zertteýge negizdelgen bolatyn. Bul sheberlik synybynyń avtorlary: «New Eastern Europe» jýrnalynyń bas redaktory Ivona Raıhardt jáne  ǵalym-saıasattanýshy, Aleksandr Kvasnevskıı atyndaǵy «Amicus Europea Foundation» qorynyń ókili Bartosh Rydlınskı.

Al, «Select Communication Group» basqarýshy dırektory qazaqstandyq Vıktor Elıseevtyń avtorlyq sheberlik dárisi medıa salasyndaǵy mańyzdy tendensıalardyń biri – BAQ «dıjıtalızasıasy» jáne aýdıtorıaǵa qajet  aqparattyq ónimdi qurýdyń jańa tásilderin qalyptastyrý jóninde boldy. Ol qazirgi jýrnalısıkanyń talǵamy da, talaby da basqa degen tujyrymǵa keldi. Sondaı-aq, «Buǵan deıin aǵa býyn kólemdi maqalalar oqý arqyly aqparat aıdynynda júrse, qazirgi jastar tipti eki joldyń ózin oqýy ekitalaı. Olar ýaqyt únemdeýdi jaqsy biledi. Sondyqtan, aqparattandyrýdyń  eń tanymal formaty – vıdeo», - dedi ol.

«JAŃALYQTAR ÁLEMİNİŃ KELESHEGİ» degen taqyrypqa toqtalǵan kelesi spıker: CNN telearnasy halyqaralyq  jobalar boıynsha  shyǵarýshy redaktor Raıan Smıt. Ol aýdıtorıa nazaryn ózine aýdaryp, qalaı senimdi aqparat kózine aınalýǵa bolatyna týraly baıandady.

«Buqaralyq aqparat quraldary áıel men qyz balalarǵa qatysty zorlyq-zombylyqqa jol beretin áleýmettik stereotıpterdi, normalar men júris-turys úlgilerin qalyptastyrýda da, sondaı-aq olarǵa qarsy kúreste  te mańyzdy ról atqarady», - degen pikirmen  «BUU-áıelder» qurylymdary qoǵammen baılanys jónindegi úılestirýshisi Gızem Iarbıl Gúro sheberlik dárisin qorytyndylady.

Jýrnalıserge tegin sheberlik dáristerin ótkizý Forýmnyń Áleýmettik seriktesi - «Samruk-Kazyna Trust» Áleýmettik jobalardy damytý qorynyń qoldaýymen júzege asyp otyr.

Forým óz tarıhynda 6000 asa sheteldik qatysýshylardy, olardyń qatarynda tanymal jýrnalıser, belgili saıasatkerler, myqty ekonomıser, nobel syılyǵynyń laýreattary, qoǵam qaıratkerleri, ǵalymdar men kásipkerlerdi Qazaqstanǵa jınady.

Eske sala keteıik, forým barysynda 300-den asa sheteldik jáne otandyq BAQ ókilderi forým jańalyqtaryn shartarapqa taratýda.