Turǵyn úı keshenderin sapasyz salǵany úshin taǵy eki qurylys kompanıanyń jáne tehnıkalyq qadaǵalaý sarapshylarynyń jumysy toqtatyldy, dep habarlaıdy Astana qalasy ákimdiginiń resmı saıty.

Ákimdik qurylys salasyn retke keltirýdi jalǵastyryp jatyr. Qazirgi kúnde Úkimet Doing Business saıasatyn júrgizýde, ol nysannyń qabyldaý jáne paıdalanýǵa berilý prosesin jeńildetedi. Alaıda, keıbir avtorlyq jáne tehnıkalyq qadaǵalaýdy júzege asyratyn jeke menshik uıymdar óz mindetterin josyqsyz oryndaýda. Osyǵan baılanysty qurylys sapasyna arnalǵan keńes barysynda Áset Isekeshev qurylys kompanıalaryn, sondaı-aq nysandardy paıdalanýǵa qabyldaý barysynda birneshe ret zań buzýshylyqtarǵa jol bergeni úshin avtorlyq jáne tehnıkalyq qadaǵalaý organdaryn atestattan jáne lısenzıadan aıyrý týraly tapsyrma berdi. 

Mysaly, belgilengen lısenzıalaý normalaryn, sondaı-aq qurylys jumysyn sapasyz júrgizgeni úshin «Sat Construction Group» JSHS jumysy toqtatyldy. Sondaı-aq, «CAC group» JSHS-niń memlekettik lısenzıasy toqtatylyp, ákimshilik jaýapkershilikke tartyldy.

Sonymen qatar, qalalyq ortanyń sapasyn baqylaý basqarmasynyń málimeti boıynsha,nysandardy salý kezinde óz qyzmetin tıisinshe júzege asyrmaǵany úshin tehnıkalyq qadaǵalaý sarapshylary - Rınat Týhvatova men Sáýle Jarmaǵanbetovanyń atestaty toqtatyldy.

Aıta keteıik, Astana qalasynda 18-maýsym kúni jeke tulǵalardyń jáne memlekettik organdardyń ótinishteri negizinde tekserý taǵaıyndaý týraly 82 akti tirkelgen. Júrgizilgen tekserýlerdiń qorytyndylary boıynsha 241 buzýshylyqtardy joıý týraly nusqama shyǵarylǵan. Osyǵan baılanysty QR zańnamasynyń talaptaryn buzǵany úshin 172 sýbekti ákimshilik jaýapkershilikke tartyldy.

Buǵan deıin habarlanǵandaı, nysandardy salý kezinde qurylys jumystaryn sapasyz júrgizgeni úshin, úsh kompanıa qurylys-montaj jumystaryn júrgizý lısenzıasynan aıyrylǵan. Qatarynda «Expolis Invest VM» JSHS (TK Royal EXPO Apartments) «Astana Trade International» JSHS («Olımp palas» TK), olardyń materıaldary Joǵarǵy sottyń qaraýynda.