Memleket basshysynyń 5 áleýmettik bastamasy boıynsha qolǵa alynǵan «7-20-25» baǵdarlamasy qazaqstandyqtardyń ál-aýqatyn jaqsartýǵa baǵyttalǵany belgili, dep jazady 24.kz.

Jańa baǵdarlama óńirlerde jemisti júzege asa bastady.

Gúlnur Sarkenova shaǵyn kásipkerler sanatynda. Shahardaǵy kóp bazardyń birinde kıim-keshek satýmen aınalysady. Kúıeýi vahtalyq ádispen Aqsaı qalasynda jumys isteıdi. Otasqandaryna alty jyl bolsa da, osy kezge sheıin páter jaldap kelipti. Endi basybaıly baspanaǵa ıe bolmaqshy. Jas januıa jańa baǵdarlama týraly estigen boıda eki bólmeli páterge ótinish bergen eken. 20% bastapqy jarnany jınaýǵa ata-anasy járdemdesipti. 

Gúlnur Sarkenova, qala turǵyny:

- 65-70 myńǵa shyǵyp tur, aı saıyn tólep turamyz. Bizge ol tıimdi dep oılaımyz, sebebi men de, joldasym da jumys isteımiz. Osy baǵdarlamamen páterge ıe bolyp jatyrmyz, Elbasymyzǵa kóp raqmet, óte qýanyshtymyz. Keshe 30 jasqa tolyp jatqan joldasyma syılyq boldy.

Jańa baǵdarlamanyń tıimdi tustary kóp. Sol sebepti, oǵan suranys ta joǵary. Jeńildetilgen nesıe alýǵa basynda baspanasy joq kez kelgen turǵyn ótinish bere alady. «Bastysy, turaqty tabysynyń bolýy», – deıdi mamandar.

Qozybaq Qulbaraqov, QR Ulttyq banki oblystyq fılıalynyń dırektory:

-Elbasynyń bastamasymen Ulttyq bankiniń bekitilgen «7-20-25» baǵdarlamasyna Oral qalasynda alǵashqy nesıeler berilip jatyr. Eń birinshi bolyp «BankSentrKredıttiń» AQ klıenti nesıe aldy. Qazir Ulttyq banktiń fılıaly osy baǵdarlamaǵa baılanysty aqparattyq túsindirý jumystaryn júrgizip jatyr.

Sergeı Potıchenko, qurylys kompanıasynyń basshysy:

- Baspanaǵa suranystyń artýy qurylys salasynyń damýyna áser etedi. Qurylys ındýstrıasy damıdy. Biz oǵan daıynbyz. Qurylys qarqynyn arttyrý úshin óńir qurylysshylarynyń áleýeti jetkilikti.

Óńirde «7-20-25» mehanızmi boıynsha ıpoteka berýmen 6 bank aınalysady. Ózge de oblystar sekildi nesıege alynatyn páterdiń quny 15 mıllıon teńgeden aspaýy tıis. Baǵdarlamaǵa qatysýshylar úshin tek birinshi kezeńde 2 myńdaı páter salý josparlanǵan.