13-14 tamyz aralyǵynda Túrkıanyń Ystambul qalasynda IýNESKO-nyń etnosport jónindegi keshendi kosýltatıvti İV keńesi ótti. Osy jıynda 2021 jyly Qazaqstannyń elordasy Astana qalasynda tarıhtaǵy tuńǵysh Álemdik etnosport oıyndaryn ótkizý sheshimi qabyldandy. IýNESKO-nyń turaqty ókilderi, qyryqtan astam memlekettiń Sport mınıstrleri, depýtattary men laýazymdy tulǵalary jáne halyqaralyq sport federasıalarynyń basshylary bas qosqan keńeste Qazaqstannyń atalmysh bastamasyna úlken qoldaý jasaldy. Sondaı-aq, osy saparda QR Ulttyq sport qaýymdastyǵy Búkilálemdik etnosport konfederasıasyna tolyqqandy múshe bolyp qabyldandy.
Eske salyp ótsek, bıylǵy jyldyń 1-2 shildesinde IýNESKO-nyń Dástúrli sporttar men oıyndar komıtetiniń ókilderi Astanaǵa arnaıy saparmen kelip, IýNESKO, QR Mádenıet jáne sport mınıstrligi jáne QR Ulttyq sport qaýymdastyǵy arasyndaǵy úshjaqty nıettestik jónindegi hatqa qol qoıylǵan bolatyn. Qazaqstan memleketiniń İ Álemdik etnosport oıyndaryn ótkizýge úmitker eldiń biri ekendigi sol kezde málimdelgen.
Sonymen, IýNESKO-nyń bastamasymen ótken dástúrli sport jónindegi Dúnıejúzilik keńeste 2021 jyly İ Álemdik etnosport oıyndarynyń Elordamyz tórinde tý kóteretini naqty aıtyldy. Tarıhta tuńǵysh ret uıymdastyrylatyn bul Álemdik etnosport oıyndaryn IýNESKO-nyń Dástúrli sporttar men oıyndar komıteti, Búkilálemdik etnosport konfederasıasy, QR Mádenıet jáne sport mınıstrligi jáne QR Ulttyq sport qaýymdastyǵy birlese ótkizedi. Sóıtip, Qazaqstan Respýblıkasynyń Táýelsizdik alǵanyna 30 jyl tolatyn merekeli jyly Astanada jer jahannyń tańdaýly ulttyq oıyndarynan ótetin sport básekeleri tamashalanatyn bolady.
