Aýyldaǵy qarapaıym halyqtyń negizgi problemalarynyń biri aýyz sý máselesi. Jyl saıyn bul problemany sheshý úshin memleket tarapynan tıisti qarajat bólinip, baǵdarlamalar men josparlar jasalyp jatyr. Osyǵan uqsas ıgi istiń biri Jambyl óńirinde atqaryldy. Ákimdik turǵyndardyń tilegin jerge qaldyrmaı, máseleni sheshti dep jazady Qamshy.kz aqparat agenttigi.  Óńirdiń turǵyndary da dán rıza.

Oblys ákimdiginde oblys turǵyndaryn aýyz sýmen jáne tabıǵı gazben qamtamasyz etý boıynsha jıyn ótti. Onda kún tártibindegi máseleler boıynsha oblys ákimdigi energetıka jáne turǵyn úı-kommýnaldyq sharýashylyq basqarmasynyń basshysy Nurlan Aldamjarov baıandama jasady. Aldymen aýyz sý máselesine toqtalǵan ol 2018 jyldyń 1 qańtarynda óńirimizdegi 4 qala boıynsha ortalyqtandyrylǵan aýyz sýmen qamtylǵany 84,7 paıyzdy quraǵanyn jetkizdi. Basqarma basshysynyń aıtýynsha oblys qalalary boıynsha kórsetkishti aǵymdaǵy jyldyń sońyna deıin 86,0 paıyzǵa jetkizý kózdelgen. Kórsetkishke qol jetkizý úshin Taraz qalasynda «Býryl A,B,V» turǵyn servıstik jelilerdiń qurylysyna bıyl respýblıkalyq jáne oblystyq búdjetten 334,6 mln.teńge bólinip, uzyndyǵy 46,2 shaqyrym bolatyn qubyr júıeleri júrgizilýde eken. Sonymen qatar, osy alqaptyń 12,3 shaqyrym sý qubyry jelilerin keńeıtýge arnalǵan quny 183,5 mln.teńge bolatyn jobaǵa oblystyq búdjetten qarjy qarastyrylǵan. Qazirgi tańda osy eki jobanyń merdiger kompanıalary jobadaǵy jumystardy júrgizýde.
Budan basqa, «Taraz sý» MKK Qant zaýyt poselkasy aýmaǵynda quny 205,6 mıllıon teńge turatyn joba boıynsha 8 kóshege 7,2 shaqyrym sý qubyrlaryn tartý jumystarymen aınalysýda, qala búdjetinen bólingen qarjyǵa 2017 jyly jumystar bastalǵan, osy jyly aıaqtalýy josparlanǵan.