Mańǵystaý oblysy ákiminiń orynbasaryna qomaqty aqshany slovakıalyq hokeı qaqpashysy bergen.
Jemqorlyqqa qarsy Ulttyq búro ortalyq apparatynyń qyzmetkerleri osy aptada joǵary laýazymdaǵy kezekti sheneýnikti ustady. Sheneýniktiń óte úlken kólemde para alǵany anyqtaldy. Álgi sheneýnik kim deseńizder – Mańǵystaý oblysy ákiminiń orynbasary Serik Amanǵalıev. Jemqorlyqqa qarsy kúreskerler qaltasynda 115 myń eýrosy bar ákim orynbasaryn Aqtaýdaǵy aeroporttan ustady. Sot ony qamaýǵa aldy. Keıin «Vremá» basylymy anyqtaǵandaı, sheneýnik aqshany sportshydan alǵan eken. Eki qazaqstandyq komandada oınaǵan burynǵy slovakıalyq hokeıshi Ian Hovan bizdiń shendige qomaqty aqsha bergen. Nege?
Ian Hovan karerasyn jaqsy bastap kele jatqan edi. Alǵashynda óz Otany úshin oınaǵan sportshy keıin Kanadaǵa aýysty. 18 jasynda «Toronto Meıpl Lıfs» klýbynyń oıynshysy boldy. Al 2009 jyly pavlodarlyq «Ertispen» kelisimge kelip, ol jerden kókshetaýlyq «Arlanǵa» aýysty. Qazaqstandaǵy karerasyn aıaqtap, Eýropaǵa ketedi. 2014 jyly qazaqstandyq «Ertiske» qaıtyp oraldy. Qazaqstanda Hovannyń turaqty jankúıerleri de bolǵan.
Sporttaǵy karerasyna núkte qoıǵan Ian Hovan bızneske taban tiredi. H + H TECHNIKA atty cheh kompanıasynyń quryltaıshysy atandy. Atalmysh fırma tońazytqyshtar ǵana emes, muz aıdyndaryna qajetti tehnıkany da shyǵardy. Burynǵy hokeıshi dál osy baǵytta jumys istedi.
♦Amanǵalıev 115 myń eýrosymen qımaı qoshtasty. Aeroportta... (vıdeo)
Qazaqstanǵa muz saraılarynyń qurylysyna qajetti aqsha quıatyn ınvestor retinde keldi. Bıyl onyń fırmasy Aqtóbedegi muz saraıyn salýǵa kirisken. Saraı qazannyń basynda ashyldy. Joba 3,8 mıllıard teńgege baǵalandy, 70 paıyz shyǵynyn sheteldik ınvestorlar ózderine aldy. Sebebi nysan áleýmettik bolǵan. Ashylý saltanatynda Ian Hovan Qazaqstanda taǵy eki jobanyń baryn aıtqan. Sonyń biri Aqtaýdaǵy muz aıdynynyń qurylysy edi. Soǵan qaraǵanda, qurylysqa aqsha bólý kerek ınvestor jergilikti sheneýnikterdiń de qaltasyn umytpaǵan. Iaǵnı Ian Hovan men Mańǵystaý oblysy ákimi orynbasarynyń aeroporttaǵy kezdesýi kezdeısoq emes. Slovakıa ınvestory sheneýnikke 115 myń eýro berip turǵan jerinen ustaldy. Nátıjesinde Ian Hovan para berýshi, al Serik Amanǵalıev para alýshy retinde sot aldynda jaýap bermek.
