Tolyqmetrajdy anımasıalyq «Kúltegin» múltfılmindegi negizgi keıipkerlerdi elimizdiń teatr jáne kıno akterleri dybystaǵan. Olardyń qatarynda: Qazaqstannyń halyq artısi Núketaı Myshbaeva, Mereı Ájibekov, Dınara Ábikeeva jáne Fılıpp Voloshın bar, dep jazady Qamshy.kz aqparat agenttigi. 

Sonymen qatar kóptegen gollıvýdtyq fılmderdi qazaq tiline dybystaǵan akterler men otandyq tanymal jas akterler Ramazan Amantaı («Bıznes po-kazahskı»), Álıhan Baısultanov («Semá Bazarbaevyh») qatysqan. Rejıserdiń aıtýynsha, otandyq akterler tarıhı keıipkerlerdi dybystaýdy asa jaýapkershilikpen jasaǵan.  

- Tarıhı keıipkerlerdi dybystaýda akterlar bar kúshin salyp jumys istedi. Jalpy bárimizge de «Kúltegin» fılmi baǵa jetpes tájirıbe berdi. Jıyrmaǵa jýyq elimizdiń úzdik kompúterlik grafıka jáne anımasıa mamandary jumys istedi. Bir jyldyń ishinde ǵana jasap shyǵardyq. Bul halyqaralyq standarttar boıynsha óte az ýaqyt. Alaıda, bar kúshimiz ben janymyzdy  salyp jasap shyǵarǵan bul týyndy kishkentaı kórermendermizben qatar, barlyq qazaqstandyqtardyń kóńilderinen shyǵatynyna senimdimin, - dedi rejıser Adaı Ábildınov.

- 

- Múltfılm keıipkerlerin dybystaǵandy qatty unatam, óıtkeni osynda ǵana daýystyń kómegimen keıipkerińniń obrazyn jasaı alasyń. Keıipkerdiń maqsatyn, erekshelikterin jáne astarly áreketterin daýys qana beredi. Bul rette akter kóptegen tehnıkalyq mashyqtarmen qarýlanýy tıis. Men úshin múltfılmde jumys isteý – úlken tájirıbe jınaý degen sóz, - dedi bala Kúltegindi orys tiline dybystaǵan  Fılıpp Voloshın.

- «Kúltegindi» kórgen kezimde onyń gollıvýdtyq múltfılmderden esh kem túspeıtinin baıqadym. Men bul múltfılmde Bilge Qaǵannyń bala kezin dybystadym. Dýblájdaǵy tájirıbem kóp bolmasa da, bul dybystaýdan erekshe lázzat aldym. Óıtkeni, menimen birge dosym Álıhan Baısultanov dybystaýǵa qatysty. Ol Kúltegindi dybystady, - dedi Ramazan Amantaı.

QR Mádenıet jáne sport mınıstriliginiń tapsyrysy boıynsha jas rejıser-anımator Adaı Ábildanyń qolynan shyqqan atalmysh tarıhı anımasıalyq týyndy kóshpendi halyqtardyń basyn biriktirip, Uly kóshpendilerdiń dástúrin jalǵastyrǵan túrik qaǵanatynyń dańqty áskerı qolbasshysy Kúlteginniń jastyq shaǵy týraly baıandaıdy. Esterińizge sala keteıik, múltfılm 22 qarashadan bastap elimizdiń barlyq kınoteatrynda prokatqa shyǵady.