«I'm a Singer Kazakhstan» talanttar shoýyndaǵy dýetterge keıde adam tańǵalady. Tipti juptarǵa qarap otyryp, bul ekeýi qalaı birge án salyp júr ózi degen oıǵa qalasyz. Alaıda, baıqaýdyń ereksheligi de osy – qalaı bolǵanda jeńimpaz ataný. Óıtkeni «ótkir qanjar qap túbinde jatpaıtyny», qashan bolsyn áıteýir qapty jaryp shyǵatyny beseneden belgili. Oǵan qosa jandy orkestrdiń súıemeldeýinde án shyrqaý da ánshilerge ońaıǵa soqpasy belgili. Orkestrge qosylý naǵyz talantty qajet etedi.
«I'm a Singer Kazakhstan» búkilhalyqtyq shoýynda naǵyz synaq endi bastaldy. Sebebi qazylar eń myqty degen oryndaýshylardy iriktep aldy. Olar endi jeke dara emes, dýet aıtyp jarysady. Juptasyp án shyrqaý jalǵyz shyrqaýdan áldeqaıda qıyn. Jańa kezeńde kórermen eki ánshiniń bireýine ǵana daýys bere alatyn bolsa, qazylar ekeýiniń qaısysy ándi myqty oryndasa, sony shoýda qaldyrady. Daýysty kóbirek jınaǵan oryndaýshy shoýda qalsa, az jınaǵan ánshi shomen qoshtasady.
«I'm a Singer Kazakhstan» talanattar shoýyna kórik beretin qatysýshylar ǵana emes. Olaı deıtinimiz, munda kezdeısoqtyq, tigisin jatqyzatyn oqıǵalar, teketirester, sonymen qatar qatysýshylardyń ózderi kútpegen tapsyrmalar jıi oryn alyp turady. Máselen, opera ánshisi Ádil Ahmetjanov pen estrada ánshisi Erkebulan Amantaıdyń dýetinde, bir qaraǵanda, úlken aıymarshylyq bar. Olardyń stıli, ándi oryndaý sheberligi, tipti daýystary da bir-birine uqsamaıdy. Ádildiń ózi moıyndaǵandaı: «Negizinde, meniń daýsym Erkebulannyń daýsyn «óshirip» tastaı alady. Ol ras». Alaıda, Ádildiń aıtýynsha, qazirgi jastarǵa, kórermenniń kóńiline, árisese qyzdar jaǵyna Erkebulannyń án oryndaý máneri men lırıkalyq ánderi kóbirek unaıdy eken.
Qarsylasynyń qýatty tembrin Erkebulannyń ózi de moıyndady. Bul dýetke arnap tańdalǵan ándi oryndaý kezinde Erkebulanǵa kúrdeli notalardy alý qıynǵa soǵypty. Sonymen, qazylar ekeýiniń qaısysyn tańdaıdy: Ádildiń operalyq daýsyn ba, Erkebulannyń lırızmin be?
«Álbette, ol menen myqtymyn dep oılaıtyn shyǵar. Alaıda ándi bireýi joǵary daýyspen, bireý tómengi daýyspen shyrqasa, ádemi án shyqpaıdy», - dedi Erkebulan. «Men onyń jeńilgenin qalamaımyn. Qajet bolsa, ol jeńiske jetsin», - dedi kenetten Ádil. Bul joly qazylardyń ózi eki talanttyń qaısysyn tańdarǵa bilmeı, qatty qobaljydy. Tipti Sáken Maıǵazıev sheshim qabyldaý úshin taım-aýt surady. Al synshy Elhan Ahmedov eki jigitke de jaqsy degen baǵa berdi. Ánshilerdiń sheberligine baǵa berý kezinde Maqpal Júnisova: «Men qazirgi jastarǵa qarap qýanamyn. Senderdiń arqalaryńda osyndaı halyqaralyq sahnada bizdiń kompozıtorlardyń ánderi shyrqalýda. Árkim ózm deńgeıinde oryndap shyqty. Degenmen, maǵan Erkebulannyń oryndaý naqyshy kóbirek unady», - dep oıyn bildirdi.
«Ádil án salǵan kezde Erkebulannyń daýsy múlde shyqpaı qaldy», - dedi Maqpal Isabekova. – Ádil án shyrqap turyp, «meniń daýsym myqtyraq» deıtindeı kórindi maǵan. Ony túsindik. Sizdiń osy týrǵa jetkenińizdiń ózi - daýsyńyzdyń arqasy. Boıyńyzda talant baryna kózimiz jetti. Al Erkebulan, sizge sahnalyq erkindik jetispeıdi. Meıli, ol konservatorıany bitirsin, meıli siz sáýletshi bola berińiz. Alaıda sahnaǵa shyqqan ekensiz, demek siz ártissiz. Al ártis sahnada ózin erkin ustaýy kerek. Qysylyp-qymtyrylsańyz, kórermen sizdi tútip jeıdi.
Bul daýdyń núktesin Ádilge 72 upaı bergen kórermen qoıdy. Qazylardyń da ortaq tańdaýy Ádilge túsken bolatyn. Sáıken aıtqandaı, kelesi týrda ol ózin jan-jaqty qyrynan kórsetedi dep úmittenemiz. Ánshige senim artyldy, onyń mindeti – endi sony aqtap shyǵý
