Nursultan Nazarbaev Astanadaǵy forýmda elimizdegi jetim balalardyń jaǵdaıyna alańdaıdy dep jazady Qamshy.kz aqparat agenttigi. Sonymen birge Elbasy Qazaqstanda balalar úıi múldem bolmaý kerektigin jáne sheteldegi asyrandy balalardyń óz elin saǵynatynyn aıtty.

«Biz arnaıy agenttik qurýǵa qatysty usynysty qoldaýymyz kerek. Múmkindigi bar adamdar jetim balalardy balalar úıinen alýy kerek. Bizdiń balalarymyz shekara asyp shet elde qalýy biz úshin qolaıly ma?» dedi prezıdent.

Keıin Elbasy Bilim jáne ǵylym mınıstri (keleside BǴM)  Erlan Saǵadıevti suraqtyń astyna aldy.

«BǴM tóraǵasy osynda bar ma? Erlan beri qara, 11 sheteldik agenttik bar, al bizde birde-biri joq», dep narazylyǵyn bildirdi Elbasy.

Al Erlan Saǵadıev sońǵy úsh jylda Qazaqstanda bir de bir bala sheteldikterge asyrap alýǵa berilmegendigin aıtty. Sonymen qatar Erlan Saǵadıev agenttik qurý ıdeıasyna qarsy emestigin jetkizdi.

Elbasy qazaqstandyq bıznesmenderdiń memlekettik saıasattyń arqasynda baıyǵanyn tilge tıek etti.

«Men burynnan kedergilerge tosqaýyl qoıyp, tekserý jumystaryn alyp tastap orta jáne kishi bızneske qoldaý bildirip kelemin. Mundaı saıasatty burynnan ustanamyn. Endi bizdiń elde halyqtyń jaǵdaıyn jasaýǵa mindetti tabysty azamattardyń sany artty. Kóptegen azamattar halyqtyń, memlekettik arqasynda baılyqqa jetti. Eger kedeıler razy bolmasa, baılar baıymaıdy», dep málimdedi Elbasy.

Osyǵan deıin BI Group kompanıasynyń basshysy Aıdyn Raqymbaev bala asyrap alý jóninde ulttyq agenttik qurý týraly usynysty aıtqan bolatyn. Tabysty bıznesmenniń aıtýy boıynsha, qazaqstandyq bıznesmender jetim balalardyń sanyn azaıtý maqsatynda qıyndyqqa tap bolǵan áıelderdi qoldaýǵa arnalǵan  «Analar úıi» jobasyn bastaǵan.