Mánerlep syrǵanaýdyń Qazaqstan chempıony Gúljan Jumadilova Startime kraýdfandıng (halyqtyń aqsha jınap berý, qazaqshalap aıtqanda jylý-red.) alańy arqyly kánkıge satyp alýǵa 400 000 teńgeni qarapaıym qazaqtan surap júrgeni týraly jazǵanbyz.
♦Mánerlep syrǵanaýdan Qazaqstannyń chempıony kánkıge aqsha tappasa da, Otanyn satqysy joq
"Qamshy" redaksıasynyń tarapynan marqum Denıstiń ókshesin basyp kele jatqan Gúljan Jumadilovaǵa Mádenıet jáne sport mınıstri Arystanbek Muhamedıuly tarapynan qoldaý kórsetilse degen oı tastaǵan edik. Aınaldyrǵan 15 mınýttyń ishinde mınıstrliktiń baspasóz hatshysy Aıdar Qyryqbaı redaksıaǵa habarlasyp, Gúljan Almatydaǵy sport ınternatynyń oqýshysy bolǵandyqtan bul máselege qala ákimdigi jaýapty ekendigin jetkizdi. Osydan keıin biz Almaty qalasy Dene shynyqtyrý jáne sport basqarmasy sporttaǵy joǵary jetistikter bóliminiń basshysy Álıa Muhtarqyzy Smaqovaǵa habarlasyp, tildestik.Gúljan daryndy balalarǵa arnalǵan sport ınternatynyń oqýshysy ekendigin aıta otyra, tolyq maǵlumatty atalmysh oqý ornynyń dırektorynan alýdy ótindi.
Al dırektor Qanat Jarylqapuly ınternatta balalarǵa barlyq jaǵdaı jasalǵanyn erekshe aıtyp ótti. «Tegin oqıdy, tegin tamaqtanady. «Almaty arena», «Halyq arena», Balýan Sholaq saraıyndaǵy muzda tegin syrǵanaýǵa bar múmkindik qarastyrylǵan. Kúnine eki ret jattyǵý jasaıdy. 16 jastaǵy jasóspirim bolǵandyqtan, bul másele shynymen de mınıstrlikke qarasty emes. Gúljan qazir Máskeýde jattyǵyp júr»,-dedi dırektor.
Bizdiń endi mánerlep syrǵanaýdan Qazaqstan Ulttyq quramasynyń bas bapkeri, qazir Tallınde júrgen Quralaı Uzýrovany mazalaýymyzǵa týra keldi. Saıysqa balalardy daıyndap júrgen bapker qarbalasqa toly ýaqytyna qaramastan vatsap arqyly bizge aqparat berýge asyqty:
«Búkil Qazaqstannyń shýlap jatqanynan habardarmyn. Gúljannyń anasy Aıjanmen de sóılestik. Kánkı tepken qyzdarymyzdyń jaǵdaıyna qarapaıym halyqtyń osynshalyqty nazar aýdarýy, árıne, qýantarlyq jaǵdaı. Sebebi ,Gúljan shynymen de bolashaǵynan kóp úmit kúttiretin talantty qyz. Alaıda bul jerde bir túsinispeýshilik oryn alǵan. Gúljanda kánkı bar. Tipti anasynyń jeke kýáliginiń kóshirmesimen qosa toltyrǵan qolhaty da bar. Oǵan sáıkes Aıjan qyzyna kánkı alyp berý úshin memleketten kómek retinde 275 000 teńge alǵan. Kánkı satyp alyndy. Biraq Gúljanǵa qazir basqa kánkı kerek. Sebebi, Gúljan jalǵyz emes, jup bolyp bılep, óner kórsetpekshi bolashaqta. Sondyqtan oǵan múldem basqa tıptegi kánkı kerek. Biraq halyqqa ótinish aıtqanda, osy bir máseleniniń basyn ashyp alý kerek edi. Qyrkúıektiń basynda ol anasymen birge Máskeýge ketti. Reseıge baryp shyńdalýǵa ózim keńes bergen bolatynmyn. Sebebi, Gúljan bıge jaqsy, harızmaǵa toly sportshy qyz. "Jup bolyp bılep óner kórsetse, kóbirek jetistikke jetedi" dep topshyladym. Osy oıymdy anasyna aıttym. Aıjan oılana kele Máskeýge attandy. Búkil qazaqstandyq BAQ "chempıon qyz" jar salýda. Aıtpaǵym, Gúljan Jumadilova - chempıon emes. Ol Qazaqstan boıynsha mánerlep syrǵanaýda tizimde 6-shy orynda turǵan sportshy. Degenmen, qaıtalap aıtamyn, talantty. Gúljannyń jańa kánkı satyp alatyn shynymen de aqshasy joq. Sondyqtan da kóp tileýi kól bolyp, qajetti qarjyny jınap bersek, nur ústine nur bolar edi".
Mánerlep syrǵanaýdan Qazaqstan Ulttyq quramasynyń bas bapkeri Quralaı Uzýrova aıtylǵan sózderin rastaıtyn qujattar baryn da aıtty.
