Almaty polısıasy departamenti úsh adam qaıtys bolǵan jol apatyna kináli Mercedes Gelandewagen júrgizýshisiniń ustalǵanyn málimdedi. Qaıtys bolǵan jolaýshylardyń ishinde kıno jáne teatr aktrısasy Sholpan Elgezekova da bar edi.

Taǵy bir jolaýshy jansaqtaý bóliminde. Ol da elge tanymal aktrısa – Aızada Satybaldıeva.

«Júrgizýshi ustaldy. Tergeý ızolátoryna jiberildi», - dep habarlady Almaty polısıa departamentiniń resmı ókili Saltanat Ázirbek.

Buǵan qosa polısıanyń habarlaýynsha, júrgizýshige eki túrli aıyppen kúdikti sanalyp otyr. QR Qylmystyq Kodekstiń 345-babynyń 3-bólimine sáıkes (Osy baptyń birinshi bóliginde kózdelgen, adamnyń abaısyzda qaıtys bolýyna ákep soqtyratyn áreket) ári 347-bapqa sáıkes (Jol-kólik oqıǵasy ornynan taıyp turý) aıyptaldy.

♦Sholpan Elgezekova qaıtys bolǵan jol apatynyń vıdeosy paıda boldy

Budan bólek apattan úsh adamnyń qaıtys bolǵany anyqtaldy. Biri  - Mercedes Gelandewagen kóligi soqqan Mitsubishi Galant júrgizýshisi, qalǵan ekeýi sol kólikte otyrǵan jolaýshylar. Taǵy bir jolaýshy aýyr halde jansaqtaý bólimine jetkizildi.

Qamshy.kz aqparat agenttigi tilshisi aýyr halde jatqan Aızada Satybaldıevanyń týysy Qanaǵat Ábilqaıyrmen tildesti.

Áıeldiń jubaıy, aqyn Baqyt Bedelhan aýrýhanada, áıeliniń janynda kórinedi. Al Qanaǵat Ábilqaıyr jeńgesiniń tez saýyǵyp ketýin ári jol apatyna kináli adamnyń qatań jazalanýyn talap etip otyr.