(foto "Shabdaly" kórkem-fılminen)

2018 jyldyń 29 jeltoqsanynda qazaq óneri maıtalmanynan, ata-ana súıikti qyzynan, bala aıaýly anasynan aıyryldy. Abaı-Seıfýllın kósheleriniń qıylysynda tańǵy saǵat 5-ter shamasynda oryn alǵan jol apaty úsh adamnyń ómirin jalmady. Sonyń biri – kıno jáne teatr aktrısasy, "Shabdaly" kórkem fılminde basty róldi somdaǵan Sholpan Elgezekova. Aktrısanyń qazasy barsha qazaqstandyqtyń qabyrǵasyn qaıystyrdy. Dostary, áriptesteri, týǵandary Elgezekovanyń ómirinen estelikter aıtyp, duǵada ekenderin jetkizip jatty.

"Qara jamylyp, qaıǵydan qabyrǵasy qaıysyp otyrǵan ata-anasynyń qasynda boldyq. "Anasynyń júregi aýyratyn edi, basqa bólmege baryp jylap keleıin..." degen ákeniń janaryndaǵy jasyn kórip, kóz jasyńa erik bermeý múmkin emes edi. Sholpan qyz ǵazız basyn sájdege qoıyp úlgerdi. Janyń jánnatta bolsyn, Shopalek", - dep tolǵandy Sáken Maıǵazıev Instagram jelisindegi paraqshasyna.

Sholpan Elgezekovanyń ómirinen estelik jazǵan rejıser Gúlsına Merǵalıeva qurbysynyń qazasyna áli de sene almaıdy.

"Sholpan endi joq. Keshir meni, Alla Taǵala, biraq jaǵa ustatarlyq habar boldy. Teatr jáne kıno aktrısasy. Óziniń qýyrshaq teatryn qalyptastyrýshy. Ana, qurby jáne kásibı maman. Eń bastysy - adam. Imandy bol, dosym, ókinishti...

Birde ol maǵan óziniń enesi jaıly aıtyp berdi.

Oqıǵa stýdenttik shaǵynda bolǵan. Ýyzdaı jas kezinde turmys quryp, dúnıege aıdaı qyz ákeledi. Sol kezde enesi 40 kúnge deıin Sholpannyń jýynýyna, syrtqa shyǵýyna, aýyr zat kóterýine tyıym salǵan eken. Kelininiń qamqorlyǵyn tolyqtaı óz moınyna alǵan. Tek sorpa qaınatyp beredi. Sholpannyń denesinen teri sý sekildi aǵatyn. Alaıda ústinen súttiń ıisi múńkip turdy. Sábıin emizdirgen soń denesin sýly oramalmen súrtip otyratyn. Sholpan da enesine baǵyndy. Túni boıy enesi kelininiń sý bolyp qalǵan ish kóılegin aýystyryp otyratyn. Mundaı sát 40 kúnge jalǵasty.

Al odan keıin ǵajaıyp ornady. Tazarǵan, aıyqqan Sholpan múldem aýyrmaǵan. Enesi jaıly qashan da jyly sózder aıtyp otyratyn, onyń meıirimin eshqashan umytqan emes".

Aıta keteıik, Sholpan Elgezekova 29 jeltoqsan tańǵa jýyq jol apatynan qaıtys boldy. Qatty jyldamdyqpen kele jatqan Mersedes Gelandewagen baǵdarshamnyń qyzyl túsinen ótip ketip, aktrısa otyrǵan kólikke soǵylady. Sonyń saldarynan Elgezekova men Mitsubishi Galant júrgizýshisi oqıǵa ornynda ajal qutshty. Al taǵy bir jolaýshy Aızada Satybaldıeva aýyr halde jansaqtaý bólimine jetkizildi.