Áleýmettik jelide teatr jáne kıno aktrısasy qaıtys bolǵan jol apatynan vıdeosy taraldy. Vıdeony túsirgen kýágerdiń aıtýynsha, Mersedes Gelandewagen kóligi baǵdarshamnyń «qyzyl» túsine ótip ketip, aktrısa otyrǵan kólikke soǵylǵan.

Jol apaty 29 jeltoqsanda tańǵa jýyq Abaı jáne Seıfýllın kósheleriniń qıylysynda oryn aldy.

«Anda bir áıeldiń ápkesi qaıtys bolypty. Júrgizýshi qashyp ketti deıdi», - dep jazylǵan Instagram jelisindegi kris_p_brothers paraqshasyndaǵy vıdeonyń astyna. Eskerte keteıik, vıdeoda boǵaýyz sózder qoldanylǵan.

Al jol apatynan keıingi oqıǵany vıdeoǵa túsirgen kýágerdiń aıtýynsha, Mersedes Gelandewagen-niń baǵdarshamnyń qyzyl túsinen 120 kılometr jyldamdyqpen ótip ketken, nátıjesinde Mitsubishi Galant kóligin soqqan.

Polısıanyń habarlaýynsha, soqqynyń saldarynan jeńil kólik jol shetine ushyp ketedi.   Mitsubishi Galant júrgizýshisi men aktrısa Sholpan Elgezekova oqıǵa ornynda qaıtys boldy.

Atalǵan iske baılanysty QR QK-niń 345-babyna sáıkes tergeý aldy is qozǵaldy.

Sholpan Elgezekova 1973 jyldyń 12 naýryzynda dúnıege kelgen. T. Júrgenov atyndaǵy Qazaq Ulttyq Óner akademıasynda oqýyn támamdaǵan. Qalıbek Qýanyshbaev atyndaǵy Memlekettik akademıalyq qazaq drama teatrynda jumys istegen.

Elgezekova bıyl shildede kórsetilimge shyqqan «Shabdaly» fılminde basty rólde, «Anashym, meni qaldyrma», «Aıman-SHolpan» telehıkaıalarynda oınaǵan.