Memlekettik aıyptaýshy Denıs Tendi sottalýshy Nuraly Qıasovtyń pyshaqtaǵanyn aıtty dep jazady Qamshy.kz aqparat agenttigi sputniknews.kz  saıtynyń deregin negizge alyp. —

Almatyda qylmystyq ister jónindegi mamandandyrylǵan aýdanaralyq sotta mánerlep syrǵanaýshy Denıs Tenniń ólimine qatysty is boıynsha sot otyrysy jalǵasty. Prokýror Qýandyq Dosov sottalýshylarǵa qatysty aıyptaý aktisin oqydy. 

Aıyptaý aktisinde aıtylǵandaı, Denıs Tenniń ólimine kúdikti Arman Qudaıbergenov 2018 jyldyń maýsymynda Shagabýtdınov-SHevchenko kósheleriniń qıylysynda turǵan Jańqabaevtyń Lexus kóliginiń aınasyn urlaǵan. Keltirilgen shyǵyn 608 myń teńgeni qurady. Óziniń qylmysyn jasyrý úshin Qudaıbergenov aınalardy Shańyraqtaǵy saıǵa laqtyryp ketken. 

"Sonymen qatar, Qudaıbergenov 11 shildede zańsyz jolmen aqsha tabý pıǵylymen Astanadaǵy kúıshi Dına kóshesinde Shámshıevtiń kóliginiń aınasyn sheship ketken. Osyǵan baılanysty Qudaıbergenovke QR QK 188-baby boıynsha aıyp taǵyldy", — dedi prokýror sot otyrysynda. 

Al Denıs Ten kóz jumǵan 19 shilde kúni sottalýshylar Nuraly Qıasov pen Janar Tolybaeva, Arman Qudaıbergenov "Magným" saýda úıinen as úı pyshaǵy men qolǵap satyp alǵan. Qurmanǵazy kóshesinen shyǵysqa qaraı Baıseıitova kóshesinde "LEXUS 708 02" kóliginiń turǵanyn baıqaıdy. 

"Olar kólikterin "Dostyq" qonaq úıiniń qasyna qaldyryp, Tenniń avtokóligine jaıaý jaqyndaǵan. Tolybaeva jan-jaǵyna qarap, adamdardyń qarasy azaıýyn, yńǵaıly sátti kútip, 7 metr ara qashyqtan aımaqty baqylap turǵan. Qudaıbergenov bolsa, kóliktiń aınasyn sheship alyp, kólik ıesine 199 myń teńge shyǵyn keltirgen. Sol sátte Denıs Ten Tolybaevanyń qasynan ótip, kóliginiń janynda bóten adamnyń turǵanyn kóredi. Onyń kólik aınasyn urlap jatqanyn baıqaǵan soń, aınasyna jarmasa ketken", — delingen aıyptaý aktisinde. 

Dosovtyń aıtýynsha, osy sátte Qudaıbergenov Baıseıitova kóshesine qaraı qasha jónelgen. Al Ten kóp uzamaı ony qýyp jetken. Sol arada Qudaıbergenov pen Ten arasynda tóbeles bastalǵan. 

"Qudaıbergenov shalbarynyń belbeýin shyǵaryp, Tenniń betinen ura bastaǵan. Sol sátte Qıasov rúkzaktan pyshaqty alyp art jaǵynan kelgen. Qıasov qylmysty jasyrý úshin ony óltirýdi oılaǵan. Qudaıbergenov Tendi ustap turady. Sol kezde Qıasov Denıs Tenniń oń jaq sanynyń arterıasynyń joǵarǵy tusynan eki ret pyshaqtaǵan", — dedi memlekettik aıyptaýshy.

Alaıda úsh kúdikti de adam óltirgenderin moıyndamaı otyr. 

Denıs Tenniń ólimine qatysty is boıynsha alǵashqy sot otyrysy 25 jeltoqsanda ótken edi. Sot aldyna úsh adam keldi — Nuraly Qıasov, Arman Qudaıbergenov jáne Janar Tolybaeva. Otyrysta kúdikti áıeldiń aıaǵy aýyr ekeni belgili boldy.

Otyrysta jábirlenýshi taraptyń advokaty Nurlan Óstemirov Denıs Ten tapsyryspen óltirildi dep málimdep, sottan isti qosymsha tergeýge jiberýdi suraǵan bolatyn. Biraq sýdıa isti qaıta tergeýge jiberýdiń qajeti joq dep sheshti. 

Budan bólek, Tenniń otbasynyń qorǵaýshysy sportshynyń ólimine sebep bolǵan aına urlanǵan sátti eki polıseıdiń kórýi múmkin ekenin aıtty.