Náreste dúnıege kelgennen keıin kóp uzatpaı, bala qyrqynan shyǵysymen-aq aýyl-úıdiń áıelderi shashýyn, jol-joralǵysyn ala kelip, balany besikke bóleıdi. Bul rásim elge qadirli, urpaq ósirgen, qadirmendi, jasy ulǵaıǵan sol áýlettegi kópti kórgen bir áıelge tapsyrylady.
Esimde, jigit shaǵymda anam shıfoner ústinde jabýly turǵan kóne besikti nusqap: «Myna besikte seniń ákeń, atań, óziń jatqansyń. Endi meniń nemerem – seniń balań jatsa eken dep armandaımyn» degen edi. Rasymen de, alǵashqy perzentim dúnıege kelgende anam atadan kele jatqan dástúrdi buzbaı, Aqbotashymdy dál osy besikke bóledi. Sol joly sábı áje áldıimen balbyrap, tynysh ári uzaq uıyqtaǵan edi...
Keıin sol besikti arqalap, Almatyǵa alyp kettik. Stýdenttik orta besigimizdi kezek-kezek terbetip, al kýrstas qyzdarymyz besik jyryn sol besiktiń basynda otyryp yńyldap úırengen edi...
Qazir bul besik kóneniń kózindeı bolyp, qara shańyraqta – ákemniń otanyndaǵy inimniń úıinde tur.
Jas náresteniń ómirge kelýi otbasy múshelerine, aǵaıyn-týysqa, ásirese, naǵashy jurtyna erekshe qýanysh syılaıtyny ras. Sábı dúnıege kelgende at jiberip, aldymen naǵashydan súıinshi suraıtyny sodan.
Degenmen, meni osy kezge deıin bir suraq mazalaýmen keledi. Ortaǵa oılasýǵa salǵanym ǵoı, bálkim, biri bolmasa, biri bilip qalar degen úmit. Tipti, úlken qarıalardan da munyń jaıyn surastyryp baıqadym. «Keıingi úrdis shyǵar...» degennen basqa mardymdy jaýap ala almadym.
Darhan kóńil syımaı keń dalasyna,
Kútti me, álde, saǵyna ári asyǵa.
Besik alyp erterek qoıypty anam,
Balasynyń bolashaq balasyna... – dep jyrlap edi bir aqyn.
Endi oılasaıyq... Jańa ómirge kelgen sábı, bizdiń túsinigimizshe, aldymen óz jurtynyń perzenti. Sondyqtan da ol osy áýlettiń besiginde terbelýi tıis. "El bolamyn deseń – besigińdi túze!" degen sodan qalsa kerek. Degenmen, keıingi kezde nárestemizdi naǵashy jurty, qudamyz syıǵa tartqan jańa besikte áldılep júrmiz. Keıbir kóp áýletti úıdiń «kladovkasynda» kelinderiniń artynan kelgen besikterdiń bir jyldan soń jap-jańa kúıinde qaz-qatar tizilip turatyny sodan.
Bilgimiz kelgeni – besikti qyz tórkininiń alyp kelýi qalaı? Álde, munyń biz bilmeıtin bir sebebi, jón-joralǵysy bar ma?
Bekjigit Serdaly
Pikir qaldyrý