Búgin Almaty qalasynda KITAP FEST – "KİTAP" merekesi aıasynda erekshe shara ótti. Zaǵıp jáne nashar kóretin azamattarǵa arnalǵan respýblıkalyq kitaphanada kórnekti etnograf Bolat Bopaıdyń «Qazaq dastarhany», «Qazaq batasy», «Qazaq dástúrleri», «Qazaq yrym-ǵuryptary» atty eńbekteri alǵash ret Braıl qarpinde (núkteli-bederli shrıft) jáne MR-3 formatynda jaryq kórip, kópshilikke tanystyryldy.

İs-sharanyń saltanatty ashylý rásimin kitaphana basshysy Asqat Baıuzaqov ashyp, bul jobanyń mańyzyna erekshe toqtaldy. Onyń aıtýynsha, ulttyq qundylyqtardy múmkindigi shekteýli jandarǵa qoljetimdi etý – mádenıet pen adamgershiliktiń bıik úlgisi.

Etnograftyń 65 jyldyǵyna arnalǵan eske alý keshinde "Erekshe jandarǵa – erekshe kitaptar" atty taqyryptyq kórme uıymdastyryldy. Kórmede Bolat Bopaıdyń etnografıalyq muralary men sırek kezdesetin qoljazbalary kópshilik nazaryna usynyldy.

Tusaýkeserge marqumnyń jary Anar hanym men uly Dýlat Bolatuly, qalamger dostary – aqyn-jazýshy Tursynbek Keshýbaı, ánshi-sazger Serik Beshenuly jáne "Qamshy" aqparat portalynyń jetekshisi Bilál Qýanysh qatysyp, Bolat Bopaı týraly estelikterimen bólisti. Olar etnograftyń halqyna degen súıispenshiligi men eńbeginiń ult rýhanıatyna qosqan úlesin erekshe atap ótti.

Shara aıasynda Bolat Bopaıdyń "Altaıym", "Aınam-aı", "Qazaq eli" atty ánderi oryndalyp, kórermenderge rýhanı lázzat syılady. Kesh jyly shyraıly atmosferada ótip, qatysýshylar etnograftyń baı murasyna jańasha kózqaraspen úńilýge múmkindik aldy.