Pavlodar oblysynyń prokýratýrasy Ertis aýdanynda áleýmettik osal toptarǵa arnalǵan turǵyn úıdi bólý kezinde zań buzýshylyqtar bolǵanyn málimdedi. Tekserý nátıjesinde jetim balaǵa tıesili páter aýdan ákiminiń jańadan taǵaıyndalǵan orynbasaryna berilgen.

2025 jyldyń aqpan aıynda Ertis aýdany ákiminiń orynbasary qyzmetine kirisken Roza Aqanovaǵa páter berilgen. Bul sheshimdi aýdandyq naqty sektor bóliminiń basshysy Qaırolla Eleýkenov qabyldap, Aqanovany buryn jetim balaǵa jalǵa berilgen páterge ornalastyrǵan. Sheneýnikter jetim qyzdyń páterde sońǵy bir jyldan beri turmaǵanyn aıtyp, baspanany bos dep eseptegen.

Máseleni oblystyq Ádep keńesi qarap, memlekettik turǵyn úı qoryn maqsatsyz paıdalanǵan bólim basshysyna shara qoldanyldy. Al Aqanova páterdi bosatyp, shyǵýǵa mindetteldi. Oǵan «qyzmetine tolyq sáıkes emestigi týraly» resmı eskertý jasaldy.

Prokýratýranyń málimetinshe, bul — jekelegen emes, júıeli sıpat alǵan másele. Máselen, Mútkenov kóshesindegi áleýmettik páterde de aýdan ákiminiń orynbasary turǵan. Sondaı-aq, №1 Ertis orta mektebiniń muǵalimi osyndaı úıde bes jyl boıy zańsyz turyp kelgen.

Qazirgi tańda Ertis aýdanynda osyndaı maqsattaǵy bos turǵan 14 páter bar. Alaıda olar áli kúnge deıin shyn máninde muqtaj azamattarǵa berilmeı otyr. Prokýratýra jaǵdaıdy qalpyna keltirip, ádil sheshim qabyldaýdy talap etti.