Jol qatelikti keshirgen emes. Qanshama adamdardyń kúndelikti ómiri jol apatynyń saldarynan qıylýda. Eldi eleń etkizgen apat Almaty qalasynda oryn alyp, dúıim jurttyń qabyrǵasyn qaıystyryp ketti. Bir ǵana qatelik birneshe adamnyń jaryq dúnıemen qoshtasýyna sebep boldy. Abaısyzda jasady dep te aıtýǵa aýyz barmaıdy. 

Ótken jyldyń 29 jeltoqsanynda bolǵan jol apaty bir emes, úsh adamnyń ómirin jalmap, taǵy bireýin aýrýhana kereýetine baılap qoıdy. Eshkimniń de basyna salmasyn mundaı qaıǵyny...

♦Jantúrshigerlik jol apatynda qaıtys bolǵan úshinshi adam kim?

Búgingi áńgime osy qazaly oqıǵanyń qurbany Dınara Hamıtova jaıynda bolmaq. Qaıǵyly qazadan soń áli esin jıyp úlgermegen marqumnyń týystary bizben az-maz estelikterimen bólisti. Saıtymyzda marqumnyń áleýmettik jelidegi sońǵy jazbasy jarıalanǵan bolatyn.

«Dınara 1978 jyly Kókshetaý qalasynda dúnıege kelgen. Balalyq shaǵyn týǵan qalasynda ótkizip, keıin Astanaǵa kóship, sol jerde jumys istep júrdi. Keıinnen 2018 jyldyń tamyz aıynda Almatyǵa kóship keldi.

♦Marqumnyń sońǵy jazbasy...

Dınara sol oqıǵada kóz jumǵan aktrısa Sholpan Elgezekovanyń jaqyn qurbysy edi. Barlyq merekelerdi birge toılatyp, bir-biriniń týystarymen de jaqsy aralasatyn. Ata-anasynyń jalǵyz qyzy edi, artynda baýyrlary – aǵasy men inisi qaldy jáne óziniń eki balasy bar...» - deıdi Dınaranyń inisi Azamat Hamıtov.

Belgili bolǵanyndaı, jol apatyna kináli Kar Ilás Ismarovıch bul oqıǵadan keıin Dınaranyń otbasyna habarlasyp, keshirim de  suramaǵan.

«Biz máıithanadan onyń denesin alyp kettik te, Kókshetaýǵa aparyp jerledik. Bul ýaqytqa deıin biz kináli taraptan eshkimdi kórmedik, eshbiri bizge habarlasqan joq. Sholpan ápkeniń týystary sotqa beripti dep estidim, bir-eki kúnde biz de Almatyǵa kelip, kináli azamattyń ózine laıyqty jazasyn alýy úshin barynsha tyrysamyz. Barlyǵyn zań aıasynda sheshetin bolamyz», - deıdi.

Azamat Hamıtov ápkesiniń óte ashyq-jarqyn, kóńildi adam bolǵanyn eske túsirip, onyń bolashaqqa qurǵan jospary kóp bolǵanyn aıtady.

«Dınara bárimizge týǵanymyzdaı bolyp ketken. Ózi únemi kóńildi júretin, ómirge qushtar jan edi. Kez kelgen merekede basymyzdy qosyp, bárimizdi bir dastarhan basyna jınap otyratyn. Ol kún sekildi aınalasyn nurlandyryp júretin edi...» - deıdi Azamat.