Kyzylorda-news.kz redaksıasyna Polsha azamatshasy Ýla Kotarba áleýmettik jeli arqyly habarlasyp, qazaqstandyq otbasyn izdep jatqanyn aıtqan eken, dep jazady Qamshy.kz aqparat agenttigi.

Anasy Izabella Brest qalasynda dúnıege kelip, 30 jyldardyń sońynda ákesi qamaýǵa alynǵan soń anasy jáne ápkesimen birge Qazaqstanǵa jer aýdarylady. Bastapqyda Itıýmen keńesine jiberilip, keıin ápkesiniń dertine baılanysty Makınkadaǵy aýrýhanaǵa jetkiziledi.

Barar jer, basar taýy bolmaǵan otbasyǵa jergilikti turǵyn Ýstıná Mırenchýk kómektesip, pana bolypty. Ol áıel men bala-shaǵasyn úıine kirgizip, qamqorlyq jasap, bir úzim nandy bólisip jegen eken.

Soǵystan soń Izabella Polshaǵa oralady, biraq Ýstınány bir sát jadynan shyǵarǵan emes. Ol qansha ýaqyt hat jazsa da, eshbir jaýap bolmapty. 1970 jyly ǵana Makınkaǵa shaqyrý qaǵazyn alady.

Kókshetaýdaǵy áýejaıdan Izabellamen anasyn Ýstınányń uly Petr kútip alypty. Makınkaǵa deıin kólikpen jetip, kópten kútken kezdesý bolady. Keıinirek Petr inisimen birge Polshaǵa da baryp qaıtqan.

Qos otbasy taǵy biraz ýaqyt hat-habar almasyp turyp, kúnderdiń kúninde arada baılanys úziledi, al hattar búginge deıin saqtalmaǵan eken.

Qyzynyń aıtýynsha, Izabella Ýstınány jıi eske alady, ony men balalary týraly bir habar estisem" dep armandap júr. Qyzy Ýlanyń qazaqstandyq otbasyny izdeýge kiriskenin bilgende, qart áıel kózine jas alypty.

Internetten qansha izdep tappaǵan Ýla Kyzylorda-news.kz basylymy arqyly búkil qazaqstandyqtardan Ýstıná Mırenchýktyń otbasyn tabýǵa kómektesýdi suraıdy.

Basylym óz tarapynan Aqmola oblysy Eńbekshilder aýdany ákimdigi men turǵyndaryna úndeý jasap, sol otbasy týraly biletin jandardan habarlasýdy ótindi.

Telefon nómirleri: 8/7242/400251, 87002328933

Usynǵan: Gúlim Jaqan