Qazaqstan musylmandar dinı basqarmasy balalarǵa arnalǵan rakovınaǵa aıaǵyn jýyp turǵan er adamǵa baılanysty onyń is-áreketi durys emestigin aıtty, dep habarlaıdy Qamshy.kz aqparat agenttigi tengrinews.kz saıtynyń deregine súıenip.

Birneshe kún buryn Serik Abas-shah óziniń áleýmettik jelidegi paraqshasynda MEGA oıyn-saýyq ortalyǵyndaǵy balalar rakovınasyna aıaǵyn jýyp turǵan er adam týraly post jarıalaǵan bolatyn. Bul jaıt áleýmettik jeli qoldanýshylary arasynda qyzý talqyǵa túsip, birshama suraqtar týyndady. Belgili bolǵanyndaı, er adam qoǵamdyq dárethanada aıaǵyn jýyp, dáret alýǵa oıyn-saýyq ortalyǵy basshylyǵynan ruqsat alypty.

QMDB óz kezeginde, bul iske qatysty mán-jaıdy túsindirip, balalarǵa arnalǵan rakovınaǵa aıaq jýýdyń durys emestigin aıtty.

«Etıka men mádenıet turǵysynan qaraıtyn bolsaq, er adamnyń bul qylyǵy durys emes. Qazaqstanda túrli ult pen din ókilderi turady. Olarǵa da qurmetpen qaraýymyz kerek. Sondaı-aq, post jarıalaǵa avtor bul máseleni dál sol jerde sheshýi kerek edi. Jazba jarıalanǵannan keıin qoǵamda eki túrli pikir qalyptasyp, biri aıaq jýǵan er adamnyń isin durys dep quptasa, endi bireýler oǵan qatysty túrli bylapyt sózder aıtyp, synnyń astyna alýda. Musylmandar – óz ortasy men qoǵamǵa esh zıanyn tıgizbeıtin adamdar», - dep málimdedi QMDB baspasóz-hatshysy Aǵabek Qonarbaıuly.

Oıyn-saýyq ortalyǵynyń ákimshiligi bolsa óz kezeginde qoǵamdyq dárethanada aıaq jýýǵa eshkimge de ruqsat bermegenin aıtty.

Aıta keteıik, musylmanǵa paryz etilgen amaldyń biri – namaz oqýdyń aldynda adamdar dáret alady. Dáret alý barysynda aıaqty da jýý kerektigi belgili. Alaıda, qazirgi tańda barlyq qoǵamdyq jerlerde namazǵa jyǵylǵan adamdarǵa jaǵdaı jasalmaǵan, sondaı-aq, dáret alatyn jerler de joqtyń qasy.

«Kóptegen oıyn-saýyq ortalyqtarynda namazhanalar bar, sondyqtan da sol jerde ornalasqan dárethanada dáret alǵan durys. Halqymyzdyń 70 paıyzdan astamy musylmandar bolǵandyqtan aldaǵy ýaqytta namazhanalar men dáret alý bólmeleriniń sanyn kóbeıtken durys bolar edi», - dep aıtyp ótti Aǵabek Qonarbaıuly.

Usynǵan: Nazerke Labıhan