Bul týraly «Nur Otan» partıasy Tóraǵasynyń Birinshi orynbasary «Nur Otan Trends» pikirtalas alańynyń kezekti otyrysynda aıtty. Atalǵan is-sharada partıanyń 2030 jylǵa deıingi «Baqýatty qoǵam: onjyldyqtyń 10 maqsaty» atty jańa baǵdarlamasy talqylandy.

Máýlen Áshimbaev baǵdarlamada partıanyń aldaǵy on jylǵa arnalǵan kún tártibi kórsetilgenin aıtty.

– Memleket basshysy óziniń bes áleýmettik bastamasynda, ótken jyldyń qazan aıyndaǵy Qazaqstan halqyna arnaǵan Joldaýynda jáne sıeze sóılegen sózinde halyqtyń ál-aýqatyn ósirip, turmys sapasyn arttyrýǵa baǵyttalǵan elimizdiń jańa áleýmettik doktrınasyn baıandady. Sondyqtan partıanyń jańa baǵdarlamasy Elbasynyń osy doktrınasyn júzege asyrýǵa baǵyttalyp otyr, – dedi ol.

Sondaı-aq «Nur Otan» partıasy Tóraǵasynyń Birinshi orynbasary baǵdarlama negizinde naqty úsh qaǵıda kórsetilgenin tilge tıek etti.

– Birinshi qaǵıda, baǵdarlama maqsattarynyń azamattardyń ál-aýqatyn arttyrýǵa tikeleı baǵyttalýy. Ekinshi qaǵıda, ınklúzıvtilikpen qamtamasyz etý. Qazirgi tańda qoǵam ınklúzıv degendi kóbine múmkindigi shekteýli jandarǵa qoldaý dep túsinedi. Bul ınklúzıvtiń maǵynasyn tolyq ashpaıdy. Sondyqtan biz baǵdarlamada ony keń aýqymda qarastyryp, kómekke muqtaj barlyq janǵa áleýmettik qoldaý kórsetilýin qamtamasyz etýdi kózdep otyrmyz. Sebebi, ekonomıkalyq damýdyń ıgiligin elimizdiń barlyq azamaty men óńiri birdeı kórýi kerek. Úshinshi qaǵıda, baǵdarlamanyń Ekonomıkalyq yntymaqtastyq jáne damý uıymynyń standarttaryna negizdelýi, – dedi Máýlen Áshimbaev.

Pikirtalas barysynda «Nur Otan» partıasy janyndaǵy Strategıalyq bastamalar ınstıtýtynyń dırektory Ádil Qojyqov baǵdarlamanyń memlekettik basqarýdyń tıimdiligin arttyrý, azamattyq qoǵamdy odan ári damytý jáne jastardy qoldaý baǵyttary boıynsha tarqatyp aıtty. Al atalǵan ınstıtýt dırektorynyń orynbasary Evgenıı Kochetov baǵdarlamada aıtylǵan qazaqstandyq otbasylardyń jaǵdaıyn jaqsartý, sapaly bilimniń qoljetimdiligin qamtamasyz etý, densaýlyq saqtaý salasyn odan ári jańǵyrtý, ınklúzıvti ekonomıka men bıznesti damytý jáne azamattarǵa jaıly jaǵdaı jasaý sharalary týraly sóz qozǵady.

Sonymen qatar is-sharaǵa qatysqan Parlament Májilisiniń depýtaty Albert Raý men CSI konsaltıńti kompanıasynyń basshysy, ekonomıs Oljas Qudaıbergenov te partıanyń jańa baǵdarlamasy týraly pikirlerin bildirdi.

Aıta keteıik, «Nur Otan»-nyń jańa baǵdarlamasy partıanyń taıaýda ǵana ótken kezekti XVIII sezinde qabyldandy. Qujattyń tolyq nusqasymen partıanyń resmı saıty arqyly tanysýǵa bolady.