Almaty qalasynyń ataqty Ortalyq mádenıet jáne demalys saıabaǵynda ejelgi túrik kúntizbesin kórsetetin arhıtektýralyq músinder ornatylmaq. Bul týraly saıabaq dırektory Vladımır Kalının málim etti.

Elbasynyń «Bolashaqqa  baǵdar: Rýhanı jańǵyrý» maqalasy jarıalaǵannan  beri qazaq jeriniń ár túkpirinde tarıhtyń tańbasyn jarqyratqan jaqsy qadamdar jasalýda. Sonyń biri mine Almatynyń ásem saıabaǵyna qoıylatyn - ejelgi túrkiniń kúntizbesi. Ony eki jylǵa ártúrli ataý berip, «múshelmen» esepteý túgel túrkiniń salty desek, onyń qazaq jerinde qaıta jańǵyrtylýy ábden quptarlyq is.

Basqasyn aıtpaǵanda, Asharshylyq pen saıası qýǵyn-súrgin qurbandaryna arnalǵan eskertkish Almatynyń tórine qoıylǵanda, ákim Baýyrjan Baıbekke jurttyń alǵysy erekshe bolyp edi. Al túrkiniń túp qazyǵy sanalatyn Alash topyraǵynda, onyń ishinde, myńjyldyq tarıhy bar Almaty shaharynda ejelgi túrki kúntizbesi qaıta jańǵyrtylyp jatqany tipten qýantarlyq is boldy. Bul tek qazaqstandyqtardyń yntymaq birligin ǵana emes, Uly dalany jaǵalaı qonystanǵan alys-jaqyndaǵy kórshi memleketterdiń de kóz qýanyshyna aınalatyny sózsiz.

–Osy ýaqytqa deıin Mádenıet saıabaǵynda bizdiń ulttyq qundylyǵymyzdy dáripteıtin eshbir músin bolmaǵan. Men Qazaqstan azamaty retinde elimizdiń tarıhyn erekshe qurmetteımin. Sondyqtan da ortalyq saıabaqta qazaq halqynyń mádenıetinen syr shertetin bir músin bolýy kerek dep oılaımyn, - deıdi saıabaq dırektory Vladımın Kalının.

Áp, bárekeldi! Shyn máninde Qazaqstan halqynyń birligi men bekemdigi, bolashaǵy men kemeldiginde tek memleketqurýshy qazaqtyń ǵana múddesi bolmaýy tıis. Bul maqsat qazaq jerinde ómir súrip jatqan árbir azamattyń asyl muratyna aınalǵanda ǵana el aman, jurt tynysh mamyrajaı tirliktiń bolatyny aıtpasa da túsinikti.

Al atalǵan saıabaqqa túgeldeı qaıta jóndeý jumystaryn júrgizip, onda joǵarydaǵydaı aıta qalarlyq eleýli eskertkishter ornatylyp jatsa, bul árıne, tek almatylyqtardyń ǵana emes, búkil Qazaqstannyń maqtanyshy, abyroıy  bolmaq.

Berik Beısenuly, «Qamshy.kz» aqparat agenttiginiń bas redaktory.