Ózbekstannyń Ferǵana oblysynda hımıalyq zatty, karbıdti,  ishýge májbúrlegen synyptastarynyń kesirinen 9 synyp oqýshysy kóz jumdy dep habarlaıdy Qamshy.kz aqparat agenttigi tengrinews.kz saıtynyń deregin negizge ala otyryp.

Bul qaıǵyly oqıǵa 16 aqpan kúni Úshki (Ýchkı) aýylynda oryn alǵanymen, tek naýryzdyń basynda ǵana belgili bolǵan.

«Ol óte aq kóńil bala bolatyn. Baıdyń buzaqy balalary oǵan hımıalyq zatty qınap jutqyzǵan. Úıge kelip, sý ishkennen keıin, qatty aıqaılaı bastady. Ony aýrýhanaǵa jetkizdik»- deıdi qaıtys bolǵan balanyń týysy.

Ferǵana aýdandyq bilim berý basqarmasynyń qyzmetkeri oqýshy qaıtys bolǵany týraly  habardar etilmegenin málimdedi. Mektep muǵalimderiniń biri mekteptiń basshylyǵy bul máseleni sheshýge tyrysyp jatqanyn aıtady.

«Óler aldynda balasy óz ákesinen bul jaǵdaıdy qazbalamaýdy ótindi» - deıdi bolǵan oqıǵaǵa kýá bolǵan qaıǵy jamylǵan otbasynyń kórshileri. Aýrýhanada jatqanda ol jábirleýshilerdiń biriniń esimin atap úlgergen, al qalǵandarynyń esimderi sol kúıi belgisiz bop qaldy.

Toǵyzynshy synyp oqýshysynyń ólimi áleýmettik jelilerde úlken narazylyq týǵyzǵan. Ferǵanalyq jazýshy Nurıllo Otahanov Facebook paraqshasynda jasóspirimniń qaıtys bolǵanyn estigende qatty eseńgirep qalǵanyn jetkizedi.

«Álemde ne bolyp jatyr? Nelikten adamdar sonshalyqty qatygez bolyp bara jatyr? Men úsh-tórt kún buryn bizdiń úıdiń mańyndaǵy mektepte oqıtyn balany synyptastarynyń qolyn burap, ony karbıdti nemese soǵan uqsas nárseni jutýǵa májbúr etkenin estidim.  Bul jaǵdaıdy umytý múmkin emes, áli esimdi jınaı almaı otyrmyn. Muny jasaǵan áli mektep jasyndaǵy balalar eken! Zaman ne bop barady? »- dep jazady jazýshy.

Sonymen qatar Ózbekstannyń Bas prokýratýrasynyń baspasóz qyzmeti Gazeta.uz saıtyna bergen suhbatynda,  jasóspirim jutyp qoıǵan zat asqazanyna zaqym keltirip, asqazannyń kúıýine ákelip soqqanyn málimdedi.

Mınıstrliktiń málimetinshe, oqýshy 15 aqpanda hımıalyq zatty qoldanǵan, sonyń nátıjesinde aýrýhanaǵa túsip, 26 aqpan kúni jansaqtaý bóliminde kóz jumǵan.

Aýdarǵan: Farıza Jomartqyzy