Kelesi jyldyń 1 qańtarynan bastap Qazaqstan azamattary tabys pen múlik deklarasıasyn tapsyrady.
Mamandar qazaqstandyqtardy tabys deklarasıasyn tezirek ótkizýge shaqyryp jatyr. Óıtkeni, el azamattary qazirden qımyldamasa, qujatty ótkizýde belgili bir qıyndyqtarǵa tap bolýy múmkin. Bul týraly Almatyda ótken baspasóz máslıhatynda Respýblıkalyq kásipkerlerge kómek ortalyǵynyń dırektory Dmıtrıı Kazansev málim etti, dep habarlaıdy Qamshy.kz aqparat agenttigi Sputnik Qazaqstan saıtyna silteme jasap.
2020 jyldyń 1 qańtarynan bastap Qazaqstannyń 13 mıllıonǵa jýyq turǵyny tabys pen múlik boıynsha jyl saıyn deklarasıa ótkizetin bolady. Bul esepti el azamattary qaǵaz túrinde 2020 jyldyń 15 shildesine deıin, al elektrondy túrde 15 qyrkúıekke deıin ótkizý kerek.
"Oılańyzshy, 13 mıllıon (!) adam deklarasıa ótkizedi. Bul - óte kóp kólem. Maman retinde bul deklarasıany qaǵaz túrinde ótkizbeýge keńes berer edim. Óıtkeni ol qaýipsiz. Al kúzde sońǵy sátte 13 mıllıon adam elektrondy bazaǵa lap qoısa, ne bolady? Árıne, baza kibirtikteıdi. Saldarynan qanshama adam óziniń tabys deklarasıasyn der ýaqytynda ótkizip úlgermeı qalady. Sondyqtan, biz halyqty bul jaıt týraly aldyn ala eskertip, habarlap jatyrmyz", - dedi Kazansev.
Al deklarasıa der ýaqytynda ótkizilmeı qalsa, Kazansevtiń aıtýynsha, adam ákimshilik jaýapkershilikke tartylýy múmkin.
"Úlgermese nemese toltyrǵan qujatta shynaıy aqparat kórsetilmese, onda ol adamǵa 30 aılyq eseptik kórsetkish kóleminde nemese 75 750 teńge aıyppul salynady", - dedi ol.
Qazaqtyń toıy da deklarasıalaýǵa jatatyn bop shyqty. Árıne, toıdan túsken aqsha men syılyqtyń quny 500 myń teńgeden asqan jaǵdaıda.
"Deklarasıada quny 500 myń teńgeden asatyn, bolashaqta satýǵa bolatyn nárselerdi kórsetýge keńes beremin. Bul baǵaly buıymdar, tondar, kartınalar bolýy múmkin. Al, máselen toıdan túsken aqshalaı syılyqty deklarasıadaǵy "taǵy basqa" degen grafaǵa toltyrýǵa bolady. Óte baǵaly syılyq alsańyz, onda syılaýshydan múmkindik bolsa, chegin surap alýǵa keńes berer edim", - deıdi Kazansev.
Oǵan qosa, endi qazaqstandyqtar bank kartasy arqyly jón-josyqsyz aqsha aýdarymyn jasaı almaıdy.
"Mysaly, dosyńyz "kartany bershi, aqsha aýdartyp ala qoıaıyn" deıdi. Eger ol úlken soma bolsa jaǵdaı qıyn. Óıtkeni salyqshyǵa siz onyń qandaı aqsha ekenin dáleldeı almaısyz. Bireý kartańyzdy paıdalanyp, 1 mıllıon teńge jóneltti delik. Sol 1 mıllıon teńgeniń salyǵy sizden alynatyn bolady, sebebi ol deklarasıalanbaǵan", - deıdi ol.
Usynǵan: Maqpal Sembaı
