Rınat Jumabaevtyń jeńisine qaramastan, erler quramasy reseılikterden 1:3 esebimen utylyp qaldy.
Grosmeıster Rınat Jumabaev 2016 jylǵy álemniń vıse-chempıony Sergeı Karákındi utty.
Qos shahmatshy komandalyq álem chempıonatynyń besinshi jarys kúni kezdesken, dep habarlaıdy Qamshy.kz aqparat agenttigi Qazaqstannyń shahmat federasıasyna silteme jasap.
"Óte qıyn partıa boldy. Biraq áý bastan basymdyqty óz qolyma aldym. Qarsylasym ádettegideı keremet oıyn órnegin kórsetti", - deıdi mereıi ústem bolǵan Rınat Jumabaev.
Sergeı Karákın, onyń aıtýynsha, bes saǵattan artyq qorǵanysta oınap, qysymǵa shydamaı, qatelik jibergen.
Federasıa atap ótkendeı, Sergeı Karákın "asqan sheberlik" tanytty, biraq qazaqstandyq basym boldy.
Biraq otandasymyzdyń jeńisine qaramastan, elimizdiń erler quramasy reseılikterden 1:3 esebimen utylyp qalypty.
Al áıelder quramasy Ýkraına komandasymen kezdesip, teń túsken.
Besinshi týrdan keıin týrnır kestesindegi birinshi orynda Reseı tur, odan keıin Úndistan men Anglıa kele jatyr. Qazaqstan quramasy jetinshi orynǵa taban tiredi.
Shahmattan komandalyq álem chempıonaty Astanada naýryzdyń 4-i men 14-i aralyǵynda ótip jatyr. Jarysta 14 elden kelgen on erler jáne on áıelder quramasy baq synasýda.
Eske sala ketsek, Qazaqstan quramasy sapynda Jansaıa Ábdimálik, Dınara Sádýaqasova, Bıbisara Asaýbaeva, Gúlisqan Nahbaeva, Gúlmıra Dáýletova, Rınat Jumabaev, Mýrtas Kajgalıev, Anýar Ismaǵambetov, Denıs Mahnev pen Petr Kostenkolar óner kórsetýde.
Sharshy taqtada Qytaı, Ázerbaıjan, Iran, AQSH, Mysyr, Reseı, Shvesıa, Anglıa, Úndistan men Ýkraına, Grýzıa, Majarstan men Armenıanyń úzdikteri jarys kórigin qyzdyrýda. Olardyń arasynda álem men ár qurlyqtyń chempıony atanǵan myqtylar da az emes.
