Kópshilik bas qosqan ımandylyq jıyndarynda, juma namazda, oraza kezinde ımamdardyń tárbıelik máni bar ýaǵyz aıtyp, ımandylyqqa, tazalyqqa shaqyryp otyrýy kóńilge jylylyq uıalatady. Áıtse de, keıbir shaǵyn quran baǵyshtaýlarda bastaryna sálde oranǵandardyń otyrǵan kópshilikti «nege namaz oqymaısyńdar?», «ólimge daıyndalmaısyńdar ma?» dep ursa jóneletini unamaıdy.

Ýaǵyzdary da senimsiz. Týra jańa ǵana ana dúnıege baryp kelgendeı, «onda olaı eken, munda bylaı eken» dep oıdan jantúrshigerlik oqıǵa qurap, qara aspandy tóndirip-aq jatqany. Saqalyna silekeıi tamyp, aýyzynan kóbik shashyrap, otyrǵan jurttyń berekesin alyp, ishkenin iriń, jegenin jelim etip tynady. Dál qazir tóbeńnen tajal tónip, endi bolmasa o dúnıege attanyp keterdeı kóńil-kúıde otyrasyń. Ásirese, mynadaı «qorqynyshty» áńgimeni tyńdap otyrǵan jastar «búıtken dini qurysyn» dep, tirsekteri dirildep, bastaryn ala qashatyny daýsyz.

Imandylyqqa osylaı ýaǵyzdaı ma eken? Iman negizderin kórkem minezben, aqyl-parasatpen jetkizgen jón-aý. Eń sońǵy paıǵambarymyz Muhammed s.a.s.: «Men eń ǵajap hadısterimdi kórkem minezdi tolyqtyrý úshin jiberdim» demep pe edi? Endeshe Alla ámirin jetkizýshi árbir ımamnyń mindeti – qorqytyp-úrkitý emes, ıman men ımandylyqqa sabyrmen, parasatpen ýaǵyzdaý bolsa kerek.