Qazaqstandaǵy alǵashqy jáne ázirge jalǵyz mıtıńime byltyr jazda qatystym. A.Iláshev 36-talpynysynda ruqsat alǵan mıtıńige QR azamaty jáne saıasattanýshy retinde qatystym.
Maǵan mıtıńishilermen qatar ákimshilik ókilderiniń, máslıhat depýtattarynyń, polısıanyń jáne mıtıńini basynan sońyna deıin kameraǵa túsirgen, qara kózildirik taqqan, qara sómke asynǵan bir top jigittiń is-áreketin baqylaý kásibı turǵydan qyzyq boldy. Sol kezde qara kıimdi jigitterdiń júris-turysyna qarap, olardy KNB, ákimshiliktiń ishki saıasat bólimi nemese ákimshilikke qarasty mekemeniń qyzmetkeri bolýy múmkin dep boljadym.
Asá Týlesova “polıseıdiń fýrajkasyn ushyratyn” montajdalǵan rolıkti mıtıńiden qalmaıtyn sol qara kıimdi jigittiń biri túsirgen bolýy múmkin dep oılaımyn. Iaǵnı, ótken senbide “elıtaǵa” tanymal belsendilerdi jaǵymsyz keıipte kórsetýge keremet múmkindik týdy. Polıseıler ádettegideı mıtıńishilerge qysym kórsetti, "kara kıimdi operatorlardyń" joly bolyp, beıbit mıtıńige shyqqan medıada aty tanymal belsendiniń emosıaǵa berilgen sátin jaqsylap túsirip, ony qara nıetti kýratorlaryna, olar ony ary qaraı arsyz ıdeologtarǵa ótkizdi, olar ony Feısbýktegi jaldamaly propagandıstterge taratty.
Odan keıingi saıası repressıa propagandıstteriniń jıirkenishti is-áreketin Feısbýkte bárimiz kórip otyrmyz. “Elıta” maskasy talaı sheshilip, beti ábden ashylyp ketken jandaıshaptardy ne úshin áleýmettik jelidegi kezekti propagandaǵa qoldanyp otyr?
Meniń oıymsha, onyń eki maqsaty bar. Birinshiden, “elıta” osy propaganda arqyly A.Týlesovaǵa qatysty sottyń sheshimin qoǵamdyq jáne saıası dıskýrsta legıtımızasıalaýdy jeńildetip, batys elderi men halyqaralyq uıymdardyń aldynda óziniń beıbit mıtıńilerdegi repressıv amaldaryn aqtaý úshin jasap otyr. Ekinshiden, A.Týlesovany osyndaı rezonanspen jazalaý arqyly qoǵamdaǵy saıası belsendilerdi úrkitip, azamattardy úreıde ustaý úshin, mıtıńini agressıv adamdardyń ermegi dep kórsetý úshin jasalyp otyr. Iaǵnı, alda bolatyn mıtıńilerde óz jumysyn jeńildetip, saıası protestti “zań ústemdigin” ornatý arqyly aýyzdyqtaýǵa tyrysýdyń amaly.
Alda A.Týlesova jáne ózge saıası belsendiler “Gosdeptiń agentteri”, “sheteldik granttardy ıgerý úshin mıtıńige shyǵyp júr”, “pátaıa kolonna”, “LGBT-ny qoldaý arqyly qazaqty azǵyrýshylar” degen dástúrli tizesi shyqqan shablondarmen posttar jazylsa, tań qalmaımyn. Múmkin jazylyp ta qoıǵan shyǵar.
Sondyqtan dál qazir “qara kıimdi operatorlar” men olardyń kýratorlary, ishki saıasattyń ıdeologtary men jaldamaly propagandıstterge qoǵam retinde eseıgenimizdi dáleldeıtin kez. Olardyń adamgershilikten ada jáne ıdeıalyq turǵydan ımpotent ekenin dáleldeıtin kez. Dál qazir betsiz propagandıstter saıası belsendini jazalaý arqyly “zań ústemdigin” talap etetin kez emes. Dál qazir osy ýaqytqa deıin jappaı únsizdik pen qorqynyshtan jol bergen konstıtýsıalyq quqyqtarymyzǵa qol suǵýdy “elıtadan” toqtatýdy talap etetin kez.
Dál qazir saıası repressıaǵa qarsy kúresetin kez.
