Mańǵystaýda «Shejireli mańǵystaý» atty foto-ekspedısıa ótti. 

Elimizge belgili fotosýretshi Asylhan Ábdiraıymuly bastaǵan «Fotoóner» QB músheleri Mańǵystaýdyń keremet jerlerin aralap, fotoǵa túsirdi. Bul týraly qoǵamdyq komýnıkasıa ortalyǵynda ótken brıfıńte málim boldy.

7-10 maýsym aralyǵynda ótken foto-ekspedısıanyń negizgi maqsaty - ár ólkeniń tylsym tabıǵatyn, ádemi, kórkem jerlerin, ulttyq ónerin, dástúri men mádenıetin kórsetip, shet memleketke tanytý.

«Fotoóner» QB músheleri 4 kún ishinde Túpqaraǵan, Mańǵystaý, Qaraqıa aýdanynda bolyp, alǵash ret óńirdiń kıeli jerlerine tańǵy jáne túngi ádispen foto-túsirilim jasady. Bozjyra, Ybyqty, Tamshaly, Jyǵylǵan, Saýra, Sherqala, Aıraqty sekildi Mańǵystaýdyń syrly jerlerin (14 nysan) ekspedıtorlar fototuzaqqa túsirdi.

«Mańǵystaý tabıǵatynyń kórkemdigine kóz toımaıdy. Salt-dástúrdi óte berik ustanǵan jer. Túıe sharýashylyǵy damyǵan. Shubattyń otany sanalady. Osynyń bárin bolashaq urpaqqa qaldyrǵymyz keledi. Myń sózdi bir sýretpen jezgizý bar maqsatymyz»,-dedi Túrkistan oblysynyń fotografy, «Fotoóner» QB múshesi Maqsat Shaǵyrbaı.

Ekspedısıa músheleri Mańystaýdyń keremetterimen qosa sapardyń sońǵy kúnin Aqtaý qalasynyń kaspıı jaǵalaýyndaǵy kóriniske arnady. Shahar turǵyndarynyń teńiz jaǵasyndaǵy serýenin, jastardyń shyrqaǵan ánin, bóbekterdiń baqytty kúlkisin sátti kadrǵa túsirdi.

Ekspedısıa barysynda jas fotograftarǵa sheberlik saǵatyn ótkizý josparlanǵan bolatyn. Karantınge baılanysty bul shara keıinge qaldyryp, bolashaqta onlaın túrde ótetin boldy.  

Osylaısha ár aımaqta ótkizilgen «Fotoóner» QB músheleriniń 7-ekspedısásy kıeli ólkede ótkizildi.

«Fotografıa - bir uǵym bolǵanymen onyń janry ár túrli. Bizdiń quramdaǵy sheber mamandardyń biri tabıǵatty, biri adamnyń beınesin, endi biri týrısik áleýetin fototuzaqqa aldy. Sheteldiń keremet jerleri men nysandaryn ǵalamtordan izdegende kásibı sýretterge tap bolasyń. Al, bizde kóbinese áýesqoı túsirgen sapasyz sýretter shyǵady. Osy olqylyqtyń ornyn toltyrý úshin de atalǵan jumysty qolǵa aldyq»,-deıdi T.Júrgenov atyndaǵy óner akademıasynyń ustazy, Almaty qalasynyń «Fotoóner» QB jetekshisi Ońǵarbek Alharov.

Foto-ekspedısıaǵa sondaı-aq «Fotoóner» QB múshesi  Ernur Manapqanuly, Batys Qazaqstan oblysy «Fotoóner» QB tóraǵasy Meıirbek Tajkýranov, Mańǵystaý óńirlik «Fotoner» QB jetekshisi Serik Maıemerov, «Fotoóner» QB jas múshesi Salaýat Jánibekuly qatysty.

Mańǵystaý oblysy ákimdigi jáne Mańǵystaý oblysynyń ınvestısıalar jáne týrızmdy damytý basqarmasynyń uıymdastyrýymen ótken «SHEJİRELİ MAŃǴYSTAÝ» foto-ekspedısıasyndaǵy sapardan túsirilgen sýretterdi www.fotooner.kz saıtynan jáne respýblıkalyq BAQ betterinen tamashalaı alasyzdar. Aıta keteıik bul shara aldaǵy ýaqytta jalǵasyn tabatyn bolady.