Jazdyń nóserletip tókken jaýynynan keıin jınalyp qalǵan kólshikke eki-úsh kún boldy. Jańbyr qansha jaýsa da jazdyń ystyq kúni áp-sátte bárin keptirip, kólshiktiń de tynysyn taryltyp barady. Sol kólshikten qol sozym jerde jel ushyryp ákelgen uryqtan jaıqalyp shyqqan Qyzǵaldaq ta jańbyr jaýǵanda máz bolyp, qanyp sý iship qalǵan edi.

Endi mine, aptap ystyqtan boıyna jınalǵan sýdan da túk qalmaýǵa aınaldy. Názik sabaqtary qyp-qyzyl kúltelerdi aýyrsynyp maıysyp barady. Japyraǵy da jerge jabysa jarmasyp, bas kótere almady. Muny kórgen Kólshiktiń Qyzǵaldaqqa jany ashyp ketti. Ózin qoıshy, jerde jatqan bir shalshyq sý ǵoı. Tek, mynadaı ádemilik kóz aldynda solyp barady. Qolynan kelse kómegin aıamas edi-aý. Kól bolsa bir sirá, kólshik qalpymen ne isteı almaq?

Kók taldy at qylyp mingen bes jasar balaqaı shalshyq sýdy «keship» ótip, shóldep qalǵan «atyn» sýǵaryp jatyr edi, kenet solyp qalǵan Qyzǵaldaqty kórip qaldy.

- «Tulparym», qarashy, ana gúl de sen sıaqty shóldep qalypty. Ekeýmiz oǵan kómekteseıik, - dep tulparynan túsip, onyń «basymen» Kólshik pen Qyzǵaldaqtyń arasyna kishkentaı ǵana aryq júrgizip berdi de, «Shúý!» dep tulparyna qaıta minip, ári qaraı shaýyp ketti. Kólshik qýanyp ketti. Ol balaqaıǵa ishteı alǵysyn jaýdyryp, bar kúshin salyp kishkentaı aryqpen Qyzǵaldaqqa jetýge tyrysty. Baıaý jyljyǵan Kólshik sýy ózin asaý tolqyndy ózendeı sezinip, alǵa qaraı umtyla berdi. Aqyry, Qyzǵaldaqqa jetip, onyń boıyna nár bolyp quıyldy. Sońǵy tamshysy qalǵansha aqqan Kólshiktiń tek dymqyl tartqan orny ǵana qaldy. Al Qyzǵaldaq bolsa, kúlteleri jelmen terbelip, názik sabaǵy boı kóterdi. Bul onyń Kólshikke degen alǵysy edi.

Mıra Sembaıqyzy