Astana qalasynyń Ekonomıkalyq tergep-tekserý departamentiniń qyzmetkerleri «Zań men tártip» qaǵıdaty aıasynda «Saryarqa» aýdany ákimdigi apparatymen birlesip, aýdandyq Ardagerler keńesiniń múshelerimen aýqymdy aqparattyq-túsindirý kezdesýin ótkizdi, dep habarlaıdy Elordainfo.kz qala ákimdiginiń resmı saıtyna silteme jasap.

İs-shara Memleket basshysynyń «Zań men tártip» qaǵıdatyn qamtamasyz etý jónindegi tapsyrmalaryn júzege asyrý aıasynda uıymdastyrylyp, halyqtyń qarjylyq saýattylyǵyn arttyrýǵa baǵyttaldy.

Kezdesýdiń negizgi maqsaty – zeınetkerlerdi qarjy pıramıdalaryn taný tásilderine úıretý jáne ınternet-alaıaqtardan qorǵaný joldaryn túsindirý. Egde jastaǵy azamattar ekonomıkalyq qylmystarǵa jıi aldanatyn osal toptardyń biri bolǵandyqtan, aldyn alý jumystary quqyq qorǵaý organdary qyzmetiniń basty baǵyttarynyń biri sanalady.

Kezdesý barysynda vedomstvo ókilderi joǵary tabys ýáde etetin kúmándi ınvestısıalyq jobalarǵa aldanbaý úshin qarjy pıramıdalarynyń belgilerin; bank esepshottaryn telefon jáne ınternet-alaıaqtardan qorǵaýǵa arnalǵan sıfrlyq gıgıena negizderin; kúmándi qarjylyq usynystarǵa tap bolǵan jaǵdaıda qaıda júginý kerektigin jan-jaqty túsindirdi.

Kezdesý formaty ardagerlerge Ekonomıkalyq tergep-tekserý departamenti qyzmetkerleri men aýdan ákimdigi ókilderine ózderin tolǵandyrǵan suraqtardy tikeleı qoıýǵa múmkindik berdi.

Qatysýshylarǵa jınaqty qaýipsiz saqtaý tásilderi men tólem kartalaryn paıdalaný erejeleri boıynsha praktıkalyq keńester berildi.

«Zańdylyq pen quqyqtyq tártip ár azamattyń habardar bolýynan bastalady. Bizdiń mindetimiz – ardagerlerge qarajatyn jáne tynyshtyǵyn saqtaýǵa kómektesetin bilim berý», – dep atap ótti Ekonomıkalyq tergep-tekserý departamentiniń ókilderi.

Mundaı túsindirý sharalary elordanyń barlyq aýdanynda júıeli túrde ótkizilip keledi.

Eske sala keteıik, elordada kıberalaıaqtyqderekteri boıynsha júzdegen is qozǵaldy.