Astanadaǵy Beıbitshilik jáne kelisim saraıynda 19 mamyr men 30 qyrkúıek aralyǵynda áıgili Leonardo da Vınchıdiń ómiri men ǵylymı izdenisterine arnalǵan Leonardo da Vinci: Genius of the Renaissance halyqaralyq kórmesi ótedi, dep habarlaıdy elorda ákimdiginiń resmı saıty.

Elordaǵa Rım jáne Florensıa mýzeılerinen Leonardo da Vınchıdiń ataqty Vınchı kodeksterindegi syzbalary men jazbalary negizinde jasalǵan 40-tan astam tolyq kólemdi mehanızm úlgileri jetkizildi. Eksponattar qatarynda ushý apparattary, ınjenerlik qurylymdar, áskerı mashınalar men óz zamanynan ozyq týǵan qurylǵylar bar. Bul ónertabystar keıinnen zamanaýı tehnologıalardyń bastaýyna aınaldy.

Kórme shamamen 3 myń sharshy metr aýmaqty qamtıdy. Keńistik aýa, sý, jer jáne ot taqyryptaryna bólingen. Bul kelýshilerge Leonardonyń tabıǵat kúshterin, qozǵalysty, adam anatomıasyn jáne mehanıka zańdylyqtaryn qalaı zerttegenin tereńirek túsinýge múmkindik beredi. Jeke bólim sýretshiniń eń tanymal týyndylarynyń reprodýksıalaryna arnalǵan. Kórme zamanaýı mýltımedıalyq formatta bezendirilgen. LED-týnnelder, sıfrlyq proeksıalar men golografıalyq ınstallásıalar Leonardo da Vınchıdiń ıdeıalaryn vızýaldy túrde pash etip, onyń ónertabystary qalaı jumys isteýi múmkin bolǵanyn tanystyrady.

Kórme Qazaqstan Respýblıkasy Mádenıet jáne aqparat mınıstrliginiń jáne Astana qalasy ákimdiginiń qoldaýymen uıymdastyrylyp otyr. Jobany júzege asyrýshy – «Astana Konsert» kompanıasy.

Kórme kún saıyn saǵat 10.00-den 20.00-ge deıin demalyssyz jumys isteıdi. Mekenjaıy: Táýelsizdik dańǵyly, 57, Beıbitshilik jáne kelisim saraıy.