Abaı oblysynyń jastar saıasaty máseleleri jónindegi basqarmasynyń uıymdastyrýymen jastar arasynda quqyqtyq mádenıetti qalyptastyrý jáne qoǵamdaǵy zańǵa qurmet qundylyqtaryn dáripteý maqsatynda «Stand Up» formatyndaǵy kesh uıymdastyryldy.

İs-sharaǵa óńirge tanymal stendap-komık Dýlat Sapataı qatysyp, jastarmen erkin formatta kezdesý ótkizdi. Kesh barysynda qoǵamdaǵy tártip, jaýapkershilik, quqyqtyq sana, jastar mádenıeti men áleýmettik máseleler ázil men zamanaýı format arqyly qozǵalyp, qatysýshylar arasynda ashyq pikir almasý ótti.

Sonymen qatar, jastar arasynda ózekti bolyp otyrǵan jol qaýipsizdigi, ınternet keńistigindegi jalǵan aqparattar men dıpfeık tehnologıalarynyń qaýpi, ekologıalyq mádenıet jáne «Taza Qazaqstan» bastamasynyń mańyzdylyǵy da qamtyldy. Qatysýshylarǵa qoǵamdyq tártipti saqtaý, sıfrlyq qaýipsizdikke mán berý jáne qorshaǵan ortaǵa jaýapkershilikpen qaraý jóninde keńinen aqparat berildi.

Sharaǵa qala jastary, stýdentter men belsendi jastar qatysyp, kezdesý ashyq pikir almasý alańyna aınaldy. Qatysýshylar quqyqtyq saýattylyq, qoǵamdyq tártip jáne jastar arasyndaǵy ózara qurmet qundylyqtary jóninde óz oılaryn ortaǵa saldy.