AQSH Ádilet mınıstrligi jarıalaǵan jańa qujattarǵa sáıkes, qarjyger Djeffrı Epshteın 2008 jyly kámeletke tolmaǵandy jezókshelikke tartý isi boıynsha sottalǵannan keıin de iri banktermen jáne mıllıarderlermen baılanysyn úzbegen.
Epshteın 2008 jyly kelisim negizinde jeńil jaza alyp, federaldyq aıyptaýlardan qutylǵan. Alaıda tirkelgen seksýaldyq quqyqbuzýshy mártebesine qaramastan, ol qarjy elıtasy arasyndaǵy yqpalyn saqtap qalǵan.
Qujattarda onyń AQSH iri banki JPMorgan-daǵy burynǵy top-menedjer Djes Steılı-men tyǵyz baılanysy bolǵany aıtylady. Keıin Ulybrıtanıanyń qarjylyq retteýshisi ony Epshteınmen qarym-qatynasy týraly jańsaq málimet bergeni úshin aıyptap, qyzmetten shettetken.
Sondaı-aq Apollo Global Management kompanıasynyń negizin qalaýshy mıllıarder Leon Blek 2012–2017 jyldary Epshteınge salyq jáne múliktik keńes úshin 158 mln dollar tólegeni anyqtalǵan. Blek ózine taǵylǵan aıyptardy joqqa shyǵarady.
JPMorgan Epshteınmen qarym-qatynasyn 2013 jyly toqtatsa, keıin onyń negizgi bankine aınalǵan Deutsche Bank 2020 jyly baqylaý talaptaryn buzǵany úshin 150 mln dollar aıyppul tólegen.
Qujattarda sondaı-aq 2019 jyly tutqyndalýyna birneshe aı qalǵanda Epshteın Marokkodaǵy Marrakesh mańynan 25 mln eýroǵa záýlim saraı satyp alýǵa áreket jasaǵany aıtylady. Mámile ofshorlyq qorlar arqyly rásimdelmek bolǵanymen, bankter kúmándi aýdarymdardy keri qaıtaryp, operasıalardy toqtatqan. Kóp uzamaı ol Nú-Djersıde qamaýǵa alyndy.
Epshteın 2019 jyly kámeletke tolmaǵandardy saýdaǵa salý isi boıynsha qaıta aıyptalyp, tergeý ızolátorynda qaza tapqan.
