Ulytaý oblysynyń «Saryarqa» qoǵamdyq birlestiginiń ókilderi Qamshy.kz portalynyń redaksıasyna habarlasyp, óńirde qurylǵan Konstıtýsıalyq koalısıa múshelerine birqatar naqty talap qoıdy. Qoǵam belsendileri Konstıtýsıa jobasyn túsindirý jumystary formalızmnen arylyp, ashyq ári mazmundy qoǵamdyq talqylaýǵa ulasýy tıis ekenin atap ótti.
Ulytaý oblysynda qurylǵan Konstıtýsıalyq Koalısıa múshelerine talap!
Ulytaý óńirinde Konstıtýsıa jobasyn halyqqa túsindirý maqsatynda koalısıa qurylǵany jarıalandy. Alaıda onyń shynaıy nátıjesi tek resmı kezdesýler men esep úshin túsirilgen beınejazbalar haqynda ǵana shektelmeýi tıis.
Eńbek ujymdarynda ótetin túsindirý jumystary kóbine formaldy, úırenshikti sıpatta ótedi jáne naqty qoǵamdyq talqylaý deńgeıine jete bermeıtinin bárimiz anyq bilemiz, onyń aıaǵy tek ádemi sýretke túsýmen ǵana shekteledi.
Koalısıa qurylǵannan beri onyń birde-bir múshesiniń áleýmettik jelidegi paraqshalarynda Konstıtýsıanyń naqty qaı baptary ózgergeni, olardyń burynǵy jáne usynylyp otyrǵan jańa nusqalary, sondaı-aq olardyń artyqshylyqtary men yqtımal kemshilikteri týraly tolyq ári ashyq aqparat kezdestirmedik. Nege?
Qazirgi zaman aqparattyq tehnologıa zamany. Halyqtyń basym bóligi, ásirese jastar, aqparatty áleýmettik jeliler arqyly alady. Naqty qoǵamdyq pikir de sol jerde qalyptasady.
Osyǵan baılanysty, «Saryarqa» qoǵamdyq birlestigi Konstıtýsıalyq Koalısıanyń árbir múshesine kelesi talaptardy qoıady:
1. Konstıtýsıa jobasynyń barlyq 96 babynyń ishinde, ózgeriske usynylǵan árbir babyn jeke - jeke jarıalaý.
2. Ár baptyń burynǵy jáne jańa nusqasyn salystyrmaly túrde kórsetý.
3. Ózgeristerdiń maqsaty, artyqshylyqtary jáne yqtımal táýekelderi týraly ashyq túsindirme berý.
4. Áleýmettik jelilerde ashyq talqylaý uıymdastyryp, azamattardyń pikirine belsendilik tanytyp jaýap berý.
Mysalǵa , sýper -prezıdenttik basqarý formasynan kettik desek, naqty qaı baptarmen anyqtaýǵa bolady, sot ókilderin saılaý arqyly bekitýge qandaı kedergi bar, Quryltaıǵa depýtattardy saılaý tek partıalyq tizimmen ótse, ol partıalar kóńilden shyqpaǵan jaǵdaıda halyq kimge daýys berýi kerek, zań aldynda bári teń degen 16 bappen 48 baptyń 1 tarmaǵy qaıshy kelmeıme jáne t.b. kóptegen suraqtar bar.
Konstıtýsıalyq ózgerister - urpaq aldyndaǵy úlken jaýapkershilik. Sondyqtan Koalısıa músheleri urpaq aldyndaǵy alyp jaýapkershilikti álbette túsinýi kerek.
Sol sebepti, kópshilikti referendýmda daýys berýge kóndirgennen góri, sendirgen durys!
Qurmetpen: «Saryarqa» qoǵamdyq birlestigi.
