15 mamyr kúni Qazaqstan Respýblıkasy Prezıdentiniń janyndaǵy Ulttyq ǵylym akademıasynyń «Halyqaralyq qatynastar» ǵylymı-zertteý ortalyǵy «Ortalyq Azıa geosaıasat nysanynan belsendi aımaqtyq aktorǵa aınala ala ma?» taqyrybynda halyqaralyq dóńgelek ústel ótkizdi.

İs-shara barysynda qatysýshylar Ortalyq Azıadaǵy zamanaýı geosaıası úderisterdi, aımaqtyq yntymaqtastyqtyń keleshegin, strategıalyq avtonomıa, qaýipsizdik jáne jahandyq ózgerister jaǵdaıyndaǵy halyqaralyq ózara is-qımyl máselelerin talqylady.
Halyqaralyq dóńgelek ústelge AQSH, Úndistan, Slovenıa, Qytaı jáne basqa elderden kelgen sheteldik sarapshylar men ǵalymdar qatysty. Spıkerler qatarynda:
– Sýdhanshý S. Naıak, Podar halyqaralyq mektebiniń dırektory (Pýna, Úndistan);
– Hemsagar Barık, Djavaharlal Nerý ýnıversıteti (Nú-Delı, Úndistan);

– Klaýs Larres, Soltústik Karolına ýnıversıtetiniń qurmetti profesory (AQSH);
– Alenka Antloga, Slovenıa Respýblıkasynyń aqparat jónindegi komısary;
– Radj Kýmar Sharma, SHT ýnıversıtetiniń Gýmanıtarlyq, áleýmettik jáne lıberaldyq ǵylymdar mektebiniń qaýymdastyrylǵan profesory (Gýrýgram, Úndistan).

Sarapshylar Ortalyq Azıanyń halyqaralyq qatynastardaǵy róliniń artyp kele jatqanyn atap ótip, óńirdiń álemdik arenadaǵy turaqty ári derbes ustanymyn qalyptastyrý úshin óńirlik yntymaqtastyqty nyǵaıtýdyń mańyzdylyǵyn aıtty.
 
Dóńgelek ústel halyqaralyq sarapshylar, zertteýshiler men akademıalyq qaýymdastyq ókilderi arasynda pikir almasýǵa arnalǵan mańyzdy alańǵa aınaldy.