Ózbekstanda qarapaıym mektep muǵaliminen memleket qaıratkerine deıin ósken Tursynhan Qudaıbergenov týraly ne bilemiz?
Bul kisi týraly Qyzylorda qalasynyń turǵyny, ishki ister salasynyń ardageri, otstavkadaǵy polkovnık Habıbýlla Jumadillaev aıtqan edi. Ol Tashkentke baryp, jolyqqanyn, aǵaıyn retinde qurmet jasaǵanyn jetkizdi. Osydan keıin qandasymyz jaıly tereń izdenýge kóshtik, dep jazady Qamshy.kz aqparat agenttigi Sputnik Qazaqstan saıtyna silteme jasap.
Tursynhan Qudaıbergenov Tashkent oblysy Shynaz aýdanynda týǵan, ıaǵnı Ózbekstanda. Degenmen ákesi Aıdar qyzylordalyq. Jańaqorǵan aýdanynyń týmasy. Kezinde asharshylyq zamanynda ózbek jerine kóship barǵan. Eti tiri ol kolhoz basqaryp, búginde sol kolhoz Aıdar atynda atalady.
Ákeden erte qalǵan Tursynhannyń qarapaıym mektep muǵaliminen memleket qaıratkerine deıin ósýine ákesiniń dostary Satybaı men Ishan esimdi sharýashylyq basqarǵan azamattar kómektesedi. Dál sol kezde Ózbekstan kompartıasy Ortalyq komıtetinde hatshy bolyp kelgen Vladımır Grıgorevıch Grıshýktyń yqpalymen quqyq qorǵaý salasyna aýysty.
Aldymen ol 1982 jyly KSRO İİM akademıasynda oqyp, keıinnen Horezm jáne Ferǵana oblastyq ishki ister departamentin basqardy. Bılik basyndaǵylar ony 2006-2010 jyldary Ferǵana oblastyq ishki ister departamentiniń basshysy etip jiberdi. Óńirde qoǵamdyq tártipti kúsheıtý maqsatynda arnaıy jiberilgen bolýy tıis, óıtkeni Ferǵana oblysynda qoǵamdyq tolqý órship turǵan edi.
Osy halyq narazylyǵyn basý úshin ádeıi Tursynhannyń talapshyl prınsıpi qajet bolǵan sekildi. Sóıtip, Ferǵana oblysyndaǵy kóterilisti basýdaǵy Tursynhannyń tabandylyǵy men qyraǵylyǵy el prezıdentiniń nazaryna ilikti.
2001-2006 jyldary Ózbekstan prezıdenti Islam Kárimovtyń quqyq qorǵaý jáne baqylaý organyn úılestirýshi memlekettik keńesshisi boldy. İshki ister organynan birden mundaı bıik laýazymǵa barý kútpegen jaǵdaı.
Degenmen memleket basshysynyń seniminen shyǵyp, ózin bilikti basshy retinde tanytqany tektiligi de bolar, Tursynhan Aıdaruly qujatyndaǵy "qazaq" degen ultyn ózgertken emes. Shyn máninde, Ózbekstanda memlekettik saıasatta mundaı másele "tompaq" keletin edi.
General Tursynhan Aıdarulyn 2010 jyly Tótenshe jaǵdaılar mınıstri etip taǵaıyndady. Mınıstrlikti tabany kúrekteı jeti jyl basqardy. Qurmetti demalysqa shyqty. Biraq jaqsy qyzmetkerdi kim jibergisi keledi?
El prezıdenti almasyp, memleket basyna Shavkat Mırzıeev otyrdy. Jańa prezıdent te Tursynhandy janyna aldy. Sóıtip, memlekettik keńesshi etti. Bul joly ol jeke jáne zańdy tulǵalardyń ótinishterin qaraýdy úılestirdi jáne baqylaý jasady.
Shet eldegi shendi qazaqty jańa prezıdent jaqynda memlekettik keńesshimen qosa, Tótenshe jaǵdaılar mınıstri etip qoıdy. Bılikte júrgen qandasymyzdyń otbasylyq ómiri de ónegeli, onyń úsh uly jáne qyzy bar, nemere súıgen ata.
Usynǵan: Nazerke Labıhan
