Májilis depýtaty Janarbek Áshimjanov qańtar oqıǵasynan keıin bolyp jatqan azaptaý faktilerine baılanysty pikir bildirdi.

– Jyl basynda ómirimizge engen saıası "qasiretti qańtar" oqıǵasy táýelsizdik jyldaryndaǵy aýyr syn saǵattyń biri boldy. Oǵan resmı baǵa berildi. Memlekettik tóńkeriske jasalǵan qadam dep tanyldy. Demek, bul – táýelsizdiktiń tamyryna balta shabylǵan qadamdar. Radıkaldyq saıası toptar, naqtyraq aıtqanda, dinı toptar qara nıet, aram pıǵyldaryn júzege asyrǵysy kelgen aýyr zardapty kezeń boldy. Tipti baqylaýdan shyqqan sátti de bastan ótkerdik, – dedi májilis depýtaty.

Depýtat qańtar oqıǵasy kezinde kúsh qurylymy saladaǵy qyzmetkerlerdiń ózi beıtarap qalyp, eldiń qaýipsizdigine jaýapty qyzmet organdar halyq aldynda sharasyz kúıde qalǵanyn atap ótti.

– Shaıqalyp jatqan konstıtýsıalyq qurylymdy toqtatýǵa, joıýǵa baǵyttalǵan memleket basshysy Qasym-Jomart Toqaevtyń sheshimi arqasynda aýyr synaqtardan óttik. Barlyq jaýapkershilikti el prezıdenti óz moınyna aldy. Jalpy sol kúnderdegi ahýal, qoǵamdaǵy jaǵdaı, aýyr kóńil-kúı, baqylaýdan shyqqan sátterdiń saıası baǵasy saraptalyp, quqyqtyq baǵasy beriler, biraq halyqty qalqan etken aram pıǵyldy toptardyń jaǵdaıyna halyq alańdaýly. Osy rette biz aqparattyq-nasıhattyq jumys júrgizip, halyqqa kómektesýimiz kerek. Aıta ketetinim, halyq sol kezeńderdegi memleket basshysynyń erlik-jigerin túsine bilýi qajet. Konstıtýsıalyq qurylym túbegeıli joıylsa, osy kúnderi qandaı jaǵdaıda bolyp, neni bastan keshetinimizdi oılap kórińiz?! – deıdi Janarbek Áshimjanov.

Sondaı-aq ol qańtar oqıǵasynan keıin ustalǵandardy azaptaý faktileri kóp tirkelip jatqan Taldyqorǵan qalasyna is-saparmen barǵaly otyrǵanyn jetkizdi.

– Orynsyz, naqaq jala jabylyp jatqan, taıaqqa túsken birneshe iske qatysty prezıdent naqty tapsyrma berdi. Sóıtip birneshe azamat bosatyldy. Al endi soqqyǵa jyǵylyp jatqan aýyr azaptaýlar qoǵamnyń da, eldiń de, jeke azamat retinde meniń de janyma batady. Erteń Taldyqorǵanǵa osy oqıǵaǵa baılanysty is-saparǵa baryp, turǵyndarmen kezdesemin. Elimizde qylmys jasaǵany da, qylmysqa qatystylyǵy da zań sheńberinde qaralýy kerek. Al qyzmetin asyra paıdalanǵan tıisti vedomstvo ókilderine zań júzinde baǵasy berilýi tıis. Prokýratýra osyndaı máselege baılanysty birneshe qylmystyq is qozǵalǵany týraly málimet bergen bolatyn, – dedi depýtat.