Астанада наиб мүфти Серікбай қажы Ораздың төрағалығымен өткен Қазақстан мұсылмандары діни басқармасы Орталық аппаратының кезекті жиналысында осындай тапсырма берілді деп хабарлайды Qamshy.kz ақпарат агенттігі ҚМДБ баспасөз қызметіне сілтеме жасап. Еліміз бойынша уағыз-насихат жұмыстарының бірыңғай тәртібі мен әдебі туралы арнайы ережені әзірлеу ҚМДБ Уағыз-насихат бөліміне жүктелді.

«Өздеріңіз жақсы білесіздер, әлеуметтік желілер мен электронды ақпарат құралдарында кейбір тұлғалар уағыз айту барысында қоғамымызда қалыптасқан құндылықтарды, халқымыздың сан ғасырлық дәстүрі мен ғұрпын, жұртымыздың бай мұраларын ескермеуде. Сонымен қатар, мүфтият ғалымдары айтуы тиіс діни терең мәселелер төңірегінде үкім беріп, пәтуасын шығарып жатыр. Соның салдарынан қоғамда азаматтар мен жамағат арасында түсінбеушіліктер көрініс тапты. Бұл мәселені дер кезінде қолға алып, уағыз айтудың бірыңғай әдебі, тәртібі туралы ереже қабылдауымыз керек», – деді ҚМДБ төраға орынбасары, «Әзірет Сұлтан» мешітінің Бас имамы Серікбай қажы Ораз.

Аталған құжат ҚМДБ бекіткен тақырыптар бойынша уағыз-насихат жұмыстарының жүргізілуіне жол ашпақ.