2015 жылдың 1 маусымында әйгілі "Shakespeare's Globe" театрында "Джон Король" спектаклінің премьерасы өтеді.

Қойылымдағы басты рөлдердің бірін белгілі скрипкашы, "Алматы симфониялық оркестрінің" көркемдік жетекшісі Марат Бисенғалиевтің қызы Арухан сомдайды.

Бірнеше ғасырға созылған тарихы бар "Shakespeare's Globe" театрында алғаш рет жетекші рөлді түркі халқының өкілі орындайды.

Алматының мәдениет басқармасынан мәлімдегендей, қазақ қызының еншісіне бұйырған бұл рөл жас қыз үшін өте ерекше әрі күрделі образ. Режиссер James Dacrе Франция патшайымы, Людовик VІІІ-дің жұбайының күрделі және жиынтық образын қазақтың қызы ғана аша алады деп санайды.

Айта кетсек, біздің отандасымыз бұдан бұрын да актерлік шеберлігін шыңдап, сахна төріне сан мәрте көтерілген. Орыс тілінде халық әндерін орындап, режиссер Джо Райттың "Анна Каренина" фильміндегі басты кейіпкер Аннаның елесінің рөлін сомдады.

2014 жылы бойжеткен "Glasgow girls" телевизиялық жобасына қатысқан.