Тәуелсіз Қазақстанда ұлттық спорт­ты дамыту қолға алынып, бірқатар Халықаралық федерациялар құрылған. Солардың бірегейі – Қазақ күресі. Бүгінде Қазақ күресінен Әлем, Азия, халықаралық біріншіліктері өткізіліп тұрады. Елдегі Қазақ күресі дода­ла­рының беделі мен жүлде қоры бойынша биік шыңы – «Қазақстан Барысы» турнирі.

ҚР Президенті жүлдесі үшін өтетін дәстүрлі додаға елдің аудан, облыс, қалаларында іріктеу жарыстары өтеді.

Шаһар басшысы Б.Байбек федера­ция президенті болып табылатын Алма­тыда да жыл сайын «Алматы Барысы» турнирі өткізіліп, сегіз ауданның  жеңімпаздары кілемге шығады.

Қазақ күресінен биылғы «Алматы Барысы – 2018» турнирі Балуан Шолақ атындағы спорт сарайында 1 мамырда өтті.

Боз кілемде Алматының 8 ауда­нынан келген 24 балуан өзара бақ  сынас­ты.

Айтулы доданың салтанатты ашылу рәсімінде Алматы қаласы Денешы­нықтыру және спорт басқармасының басшысы Әбіл Дөңбаев қатысушыларға  сәттілік  пен жарқын жеңіс  тіледі.

– Елбасы Нұрсұлтан Назарбаев «Бола­шаққа  бағдар: рухани жаңғыру» атты Қазақстан халқына арнаған мақаласында «Жаңа тұрпатты жаңғырудың ең басты шарты – ұлттық кодыңды сақтай білу» деген  болатын. Осы қағиданы берік ұстан­ған мемлекетіміз әдеп-ғұрып, салт-дәстү­рімізді дәріптеп, ұлттық құндылықтары­мызды жаңғырту жолында қолда бар мүмкіндіктің бәрін жасау үстінде. Бүгінде, Қазақ күресі еліміздегі спорт түрлерінің халқымызға кеңінен танымал, ел сүйсініп тамашалайтын, нағыз текті күрес  түрі. Ал «Алматы Барысы»  турнирі – қала тұрғындары мен қонақтарына, жалпы спорт сүйер қауымға тарту етілген ерек­ше сый, дәстүрлі спорттық  мереке, – деп атап өтті.

Биыл Түрксіб ауданының өкілі Дәурен Нұралинов «Алматы Барысы-2018» атанды. Байрақты бәсекенің ақтық мәресінде ол Медеу ауданынан келген былтырғы чемпион  Руслан Абдра­зақовты (132 келі) жеңді. Жеңімпаздың өзі 122 келі салмақпен боз кілемге шық­қан. Финал шын мәнінде «алыптар айқасы» болды.

– Мен турнирді ұтып, алдағы «Қазақ­стан Барысында» Алматы намысын қорғайтыныма қуаныштымын. Президент жүл­десі – «Қазақстан Барысында» жеңіске ұмтылатын боламын, – дейді чемпион Дәурен Нұралинов.

Үшінші орын – Қола белбеуді Түрксіб ауданының балуаны Жайдар Сайлаубаев пен Елдар Насиев (Алатау ауданы) сарапқа салды. Бұл белдесуде жеңіске Жайдар Сайлаубаев жетті. Ол қола белбеу мен 100 мың теңгені қанжығасына  байлады.

Турнир чемпионына «Лада приора» көлігінің кілті мен Алтын белбеу, екінші орын иегеріне 300 мың теңге көлеміндегі ақшалай сыйлық пен Күміс белбеу табысталды. Енді олар «Қазақ­стан Барысы–2018» турнирінде Алматы­ның намысын қорғайтын  болады.

«Алматы Барысы» — Алматы қала­сының Денешынықтыру және спорт басқармасының ұйымдастыруымен өтетін дәстүрге айналған боз кілем додасы. «Спорттық Алматы» бағдар­ламасы аясындағы турнирдің басты мақсаты – қала тұрғындарының ара­сында қазақ күресін дамытып, салауат­ты өмір салтын  насихаттау.