Бокстан ерлер арасындағы Қазақстан чемпионаты Маңғыстау жерінде алғаш рет өтті. Оған еліміздің 14 облысы мен 3 қаласынан 206- боксшы қатысты. Турнир қорытындысында 2 алтын, 3 күміс және 2 қола медальмен Түркістан облысы – 1 орын, 1 алтын, 3 күміс және 4 қоламен Маңғыстау – 2 орын, 1 алтын, 2 күміс және 3 қола алған Жамбыл облысы – 3 орынға тұрақтады.

Чемпионатқа әлемдік ареналарда Қазақстанның абыройын асқақтатып жүрген Қайрат Ералиев, Василий Левит, Әбілхан Аманқұл, Асланбек Шымбергенов, Бекдәулет Ибрагимов, Абылайхан Жүсіпов, Теміртас Жүсіпов, Ильяс Сүлейменов, Ерік Әлжанов, ағайынды Төлтаевтар бар.

Жабылу салтанатын сөз алған облыс әкімі Ералы Тоғжанов турнирдің жоғары деңгейде өтуіне ат салысып, қолдау көрсеткен Қазақстан Бокс Федерациясының басшылығына алғысын айтып, жарыстың құрметті қонағы Ермахан Ыбрайымов, Бақтияр Артаев, Болат Жұмаділов, Бауыржан Оспанов, Мырзағали Айтжанов, Марат Мәзімбаев, Мерей Ақшалов, Біржан Жақып, Нұржан Кәрімжановқа Маңғыстау халқының атынан ризашылығын білдірді. "Спорт саласы қашан да елбасымыз Нұрсұлтан Әбішұлының басты назарында. Тіпті халыққа арнаған әр жолдауында да отандық спортты дамыту және салауатты өмір салтын насихаттауға басымдық бере отырып, алдымызға нақты тапсырмалар қойған болатын. Себебі бүгінгі жас спортшылар – ертеңгі елдің мықты азаматтары мен ел мерейін асқақтататын чемпиондар. Тынымсыз тер төгіп, аянбай еңбек еткен еліміздің спортшыларының туған еліміздің даңқын асырып, жаңа биіктерді бағындыра берулеріне шын жүректен тілектеспін" деді аймақ басшысы.

Сонымен қатар, салтанатты шарада екі бірдей Олимпиада ойындары мен Әлем чемпионаттарының екі дүркін күміс жүлдегері, Азия ойындарының чемпионы, Әділбек Ниязымбетов үлкен спорттағы карьерасын аяқтаған мәлімдеді. Көпшілік алдында боксшымызға құрмет көрсетіліп, халық зор қошеметпен шығарып салды.

Маңғыстаудың тағы бір батыр ұлы, халықаралық дәрежедегі спорт шебері, бокстан Азия чемпионы, Әлем чемпионатының қола жүлдегері, бірнеше дүркін ел чемпионы Берік Абдрахманов та былғары қолғабын шегеге іліп, шаршы алаңдағы орнын кейінгі жастарға аманаттады.

Айта кетейік, турнир жеңімпаздары 2019 жылы өтетін Азия және Әлем чемпионаттарына қатысу мүмкіндігіне ие болды. Ал Әлем чемпионатында 2020 жылғы Токио олимпиадасының жолдамасы сарапқа салынады. Маңғыстаулық 8 жүлдегер Ұлттық құрама сапына енеді. Келер жылы аталмыш сайыстарға дайындықты бастайды.